Explainer | கிரீன் பட்டாசு என்றால் என்ன? Green Crackers பற்றி தெரிந்துகொள்ள வேண்டிய 7 முக்கிய உண்மைகள்

புது டெல்லி: தீபாவளி என்றாலே பட்டாசுகள் நினைவுக்கு வரும். ஆனால் அதிகரித்து வரும் காற்று மாசுபாடு காரணமாக கடந்த சில ஆண்டுகளாக "கிரீன் பட்டாசு" (Green Crackers) என்ற பெயர் பரவலாக பேசப்படுகிறது. சாதாரண பட்டாசுகளை விட 30% வரை மாசுபாட்டை குறைக்கும் என கூறப்படும் இந்த பட்டாசுகள் உண்மையில் சுற்றுச்சூழலுக்கு நல்லதா? அல்லது இது ஒரு மார்க்கெட்டிங் கருத்தாக்கமா? கிரீன் பட்டாசுகளின் அறிவியல் பின்னணி, வகைகள், சான்றிதழ் நடைமுறைகள் மற்றும் சமீபத்திய ஆய்வுகள் என்ன கூறுகின்றன என்பதை விரிவாக பார்ப்போம்.

Green Crackers என்றால் என்ன?

கிரீன் பட்டாசுகள் என்பது வெடிக்கும் போது வெளியாகும் மாசுபடுத்தும் துகள்கள் மற்றும் வாயுக்களின் அளவைக் குறைக்கும் நோக்கில் உருவாக்கப்பட்ட பட்டாசுகள் ஆகும். இதற்காக மாற்றியமைக்கப்பட்ட இரசாயனக் கலவைகள், குறைந்த அளவிலான மூலப்பொருட்கள் மற்றும் சிறப்பு சேர்மங்கள் பயன்படுத்தப்படுகின்றன. இதன் முக்கிய நோக்கம் காற்று மாசுபாட்டைக் கட்டுப்படுத்துவது மட்டுமல்லாமல், பட்டாசுகளின் ஒளி மற்றும் ஒலி அனுபவத்தையும் தொடர்வதாகும்.

கிரீன் பட்டாசுகள் ஏன் உருவாக்கப்பட்டன?

இந்தியாவில் தீபாவளி காலங்களில் அதிகரிக்கும் காற்று மாசுபாடு மற்றும் உடல்நல பாதிப்புகள் குறித்து தொடர்ந்து கவலைகள் எழுந்தன. இதன் காரணமாக CSIR (Council of Scientific and Industrial Research) NEERI (National Environmental Engineering Research Institute) இணைந்து குறைந்த மாசு உமிழும் பட்டாசுகளை உருவாக்கும் முயற்சியை தொடங்கின.

2018 ஆம் ஆண்டு உச்ச நீதிமன்றம் பாரம்பரிய பட்டாசுகளுக்கு பல கட்டுப்பாடுகளை விதித்ததைத் தொடர்ந்து, கிரீன் பட்டாசுகள் அதிகாரப்பூர்வமாக அறிமுகப்படுத்தப்பட்டன.

கிரீன் பட்டாசுகளுக்கான சான்றிதழ் எப்படி வழங்கப்படுகிறது?

CSIR-NEERI நிர்ணயித்துள்ள விதிகளின்படி ஒரு பட்டாசு கிரீன் பட்டாசு என அங்கீகரிக்கப்பட வேண்டுமெனில், துகள்மாசு (Particulate Matter) குறைந்தது 30% அளவிற்கு குறைந்திருக்க வேண்டும். அல்லது துகள்மாசு 20% குறைய வேண்டும். அதேபோல வாயு வெளியேற்றம் (Gas Emissions) குறைந்தது 10% குறைந்திருக்க வேண்டும். பட்டாசுகளின் புகை, துகள்கள், வாயுக்கள் மற்றும் தடைசெய்யப்பட்ட இரசாயனங்கள் அனைத்தும் ஆய்வக பரிசோதனைகளுக்கு உட்படுத்தப்படுகின்றன.

மேலும் படிக்க - Explainer: டெல்லி நகரை வாட்டும் காற்று மாசுபாடு, திணறும் மக்கள்: 470-ஐத் தாண்டும் AQI

கிரீன் பட்டாசுகள் உண்மையில் மாசுபாட்டை குறைக்கிறதா?

இதுதான் பலருக்கும் இருக்கும் முக்கிய கேள்வி. இதற்கான பதில் "இல்லை" என்பது தான். அதாவது கிரீன் பட்டாசுகள் மாசுபாட்டை முழுமையாக நிறுத்துவதில்லை. அவை வெறும் மாசுபாட்டின் அளவைக் குறைக்கும் வகையில் மட்டுமே வடிவமைக்கப்பட்டுள்ளன.

அதாவது கிரீன் பட்டாசுகள் வெடிக்கும் போதும் புகை வெளியேறும், நுண்துகள்கள் உருவாகும் மற்றும் காற்று மாசுபாடு ஏற்படும். ஆனால் பாரம்பரிய பட்டாசுகளை விட இதன் தாக்கம் குறைவாக இருக்கும் என்பதே இதன் நோக்கம்.

கிரீன் பட்டாசுகள் எத்தனை வகைப்படும்?  

கிரீன் பட்டாசுகளில் மூன்று முக்கிய வகைகள் உள்ளன. அதாவது SWAS, STAR மற்றும் SAFAL என 3 வகைகளில் உருவாக்கப்படுகின்றன. அவற்றை பற்றி விரைவாக பார்ப்போம்.

SWAS (பாதுகாப்பான நீர் வெளியேற்றி)

SWAS வகை பட்டாசுகளில் பாலிமர் ஹைட்ரோஜெல் தொழில்நுட்பம் பயன்படுத்தப்படுகிறது. வெடிக்கும் போது உருவாகும் துகள்களை கட்டுப்படுத்தவும், தூசி பரவுவதை குறைக்கவும் இது உதவுகிறது.

ஸ்டார் (பாதுகாப்பான தெர்மைட் உடைப்பான்)

இந்த வகையில் இரும்பு ஆக்சைடு (Iron Oxide) பயன்படுத்தப்படுகிறது இது எரிப்பு செயல்பாட்டை மேம்படுத்தி, மாசுபடுத்தும் வெளியேற்றங்களை குறைக்க உதவுகிறது.

SAFAL (பாதுகாப்பான குறைந்தபட்ச அலுமினியம்)

SAFAL பட்டாசுகள் குறைந்த அளவு அலுமினியம் பயன்படுத்தும் வகையில் உருவாக்கப்பட்டவை. இதனால் எரியும் போது உருவாகும் சில தீங்கு விளைவிக்கும் துகள்களின் அளவு குறைகிறது.

கிரீன் பட்டாசுகள் குறித்து டெல்லி ஆய்வு என்ன சொல்கிறது?

2019 தீபாவளி காலத்தில் டெல்லி டெக்னாலஜிக்கல் பல்கலைக்கழகத்தில் (DTU) நடத்தப்பட்ட ஆய்வு கவனத்தை ஈர்த்தது. இந்த ஆய்வில், க்ரீன் பட்டாசுகள் வெளியிடும் மிக நுண்ணிய துகள்களின் (Ultrafine Particles) விகிதம் 0.72 என பதிவாகியது. சாதாரண பட்டாசுகளில் இது 0.6க்கும் குறைவாக இருந்தது. 

இதனால் சில கிரீன் பட்டாசுகள் சாதாரண பட்டாசுகளை விட அளவில் சிறிய துகள்களை அதிகமாக வெளியிடக்கூடும் என்ற சந்தேகம் ஆய்வாளர்களிடம் எழுந்தது. ஆனால் இதனால் அனைத்து கிரீன் பட்டாசுகளும் அதிக மாசுபாடு உருவாக்குகின்றன என்று உறுதியாக கூற முடியாது.

கிரீன் பட்டாசுகள்: சுற்றுச்சூழல் நிபுணர்கள் கூறுவது என்ன?

சுற்றுச்சூழல் விஞ்ஞானிகள் கூறுவதாவது, "ஒரு பட்டாசு சுற்றுச்சூழலுக்கு எவ்வளவு பாதிப்பை ஏற்படுத்துகிறது என்பதை வெறும் மொத்த மாசு வெளியேற்றத்தின் அடிப்படையில் மட்டும் மதிப்பிட முடியாது. அதில் துகள்களின் அளவு, துகள்களின் எண்ணிக்கை, வெளியேறும் வாயுக்கள், இரசாயன கலவைகள் "என பல அம்சங்கள் முக்கிய பங்காற்றுகின்றன. அதனால் கிரீன் பட்டாசுகளின் தாக்கம் குறித்து தொடர்ந்து ஆய்வுகள் நடைபெற்று வருகின்றன.

கிரீன் பட்டாசுகள் விலை அதிகமா?

பொதுவாக சாதாரண பட்டாசுகளை விட கிரீன் பட்டாசுகளின் விலை சற்று அதிகமாக இருக்கும். ஏனென்றால் கிரீன் பட்டாசுகள் தயாரிக்கப்படும் தொழில்நுட்பம் மற்றும் மூலப்பொருட்கள் காரணமாக அவற்றின் விலை சாதாரண பட்டாசுகளை விட சற்று அதிகமாக இருக்கும். சந்தை நிலவரத்தைப் பொறுத்து, 10% முதல் 20% வரை அதிக விலை காணப்படலாம்.

கிரீன் பட்டாசுகள் வாங்கும் முன் தெரிந்துகொள்ளுங்கள்

கிரீன் பட்டாசுகள் சுற்றுச்சூழலை முழுமையாக பாதுகாக்கும் தீர்வு அல்ல. ஆனால் பாரம்பரிய பட்டாசுகளுடன் ஒப்பிடும்போது மாசுபாட்டைக் குறைக்கும் முயற்சியாக பார்க்கப்படுகின்றன. அதே நேரத்தில் சில ஆய்வுகள் கிரீன் பட்டாசுகளும் நுண்துகள்களை அதிக அளவில் வெளியிடக்கூடும் என எச்சரிக்கின்றன. எனவே "கிரீன்" என்ற பெயரால் மட்டுமே பாதுகாப்பானது என கருதாமல், அறிவியல் தகவல்களை அடிப்படையாகக் கொண்டு விழிப்புணர்வுடன் பயன்படுத்துவது அவசியமாகிறது.

மேலும் படிக்க - தீபாவளி வந்தாச்சு!! இந்த ஆண்டு சிவகாசி பட்டாசில் என்ன ஸ்பெஷல்? ரேஸ் கார் முதல் சீட்டி மார் வரை... ஒரு பார்வை