அக்னிபத் திட்டத்தில் சேரும் அக்னிவீரர்கள் திருமணம் செய்துக்கொள்ள முடியாதா? என்ன காரணம்?

புது டெல்லி: இந்திய அரசின் அக்னிபத் (Agnipath) திட்டத்தில் முக்கியமான மாற்றம் ஒன்று அறிவிக்கப்பட்டுள்ளது. இதுவரை 4 ஆண்டுகள் மட்டுமே சேவை வழங்கிய அக்னிவீர்களுக்கு, இனி கூடுதலாக 2 ஆண்டுகள் சேவையை நீட்டிக்கும் வாய்ப்பு வழங்கப்பட உள்ளது. இதனால் அக்னிவீர்களின் மொத்த சேவை காலம் 6 ஆண்டுகளாக உயரக்கூடும்.

இந்த புதிய மாற்றம் வெளிவந்ததைத் தொடர்ந்து, அக்னிவீர்களின் திருமண விதிகள் தொடர்பாகவும் பல்வேறு கேள்விகள் எழுந்துள்ளன. குறிப்பாக 6 ஆண்டுகள் சேவையில் இருக்கும் அக்னிவீர்களுக்கு திருமணம் செய்ய அனுமதி வழங்கப்படுமா என்ற எதிர்பார்ப்பு அதிகரித்துள்ளது.

அக்னிபத் திட்டம் என்றால் என்ன?

அக்னிபத் திட்டம் என்பது இந்திய அரசால் அறிமுகப்படுத்தப்பட்ட சிறப்பு ராணுவ ஆட்சேர்ப்பு திட்டமாகும். இந்த திட்டத்தின் மூலம் இளைஞர்கள் இந்திய ராணுவம், கடற்படை மற்றும் விமானப்படையில் "அக்னிவீர்" என்ற பெயரில் சேர்ந்து சேவை செய்ய முடியும்.

பொதுவாக 17.5 வயது முதல் 21 வயது வரையிலான இளைஞர்கள் இந்தத் திட்டத்தின் கீழ் ஆட்சேர்ப்பு செய்யப்படுகிறார்கள். நாட்டின் பாதுகாப்பு அமைப்பில் இளைஞர்களின் பங்களிப்பை அதிகரிக்கும் நோக்கத்துடன் இந்தத் திட்டம் செயல்படுத்தப்படுகிறது.

4 ஆண்டுகளில் இருந்து 6 ஆண்டுகளாக சேவை காலம் உயர்வு

தொடக்கத்தில் அக்னிவீர்கள் 4 ஆண்டுகள் சேவை செய்யும் வகையில் திட்டம் வடிவமைக்கப்பட்டது. ஆனால் புதிய அறிவிப்பின் படி, சுமார் 75 சதவீத அக்னிவீர்கள் விரும்பினால் மேலும் 2 ஆண்டுகள் சேவையை நீட்டித்துக் கொள்ள முடியும். மீதமுள்ள 25 சதவீத அக்னிவீர்கள் செயல்திறன் மற்றும் தகுதி அடிப்படையில் நிரந்தர ராணுவப் பணிக்குத் தேர்வு செய்யப்படுவார்கள். இதன் மூலம் அதிகமான அக்னிவீர்கள் நீண்டகால ராணுவ அனுபவத்தைப் பெறும் வாய்ப்பு உருவாகியுள்ளது.

தற்போதைய திருமண விதிகள் என்ன சொல்கின்றன?

அக்னிவீராக சேர விரும்பும் விண்ணப்பதாரர்கள் ஆட்சேர்ப்பின் போது திருமணமாகாதவர்களாக இருக்க வேண்டும் என்பது கட்டாய விதியாக உள்ளது. 

அதுமட்டுமல்லாமல், ஆரம்ப 4 ஆண்டுகளுக்கான சேவை காலத்தில் அக்னிவீர்கள் திருமணம் செய்து கொள்ள அனுமதிக்கப்படுவதில்லை. இந்த விதி தற்போது முழுமையாக நடைமுறையில் உள்ளது.

மேலும் படிக்க - அக்னிவீர்களுக்கு மத்திய அரசின் மெகா அறிவிப்பு: சேவை காலம் 4 ஆண்டுகளில் இருந்து 6 ஆண்டுகளாக உயர்வு

ஏன் திருமணத்திற்கு கட்டுப்பாடு விதிக்கப்பட்டுள்ளது?

ராணுவ நிர்வாகத்தின் விளக்கப்படி, முதல் நான்கு ஆண்டுகள் மிகவும் கடுமையான பயிற்சி மற்றும் செயல்பாட்டு பணிகளுக்கான காலமாக கருதப்படுகிறது. இந்த காலத்தில் உடல் தகுதி, ஒழுக்கம், ராணுவப் பொறுப்புகள் மற்றும் தேசிய பாதுகாப்பு தொடர்பான பணிகளில் முழுமையான கவனம் செலுத்த வேண்டியது அவசியமாகிறது. இதன் காரணமாகவே திருமணத்திற்கு தடை விதிக்கப்பட்டுள்ளது.

6 ஆண்டுகள் சேவை காலம்

17.5 முதல் 21 வயதுக்குள் அக்னிவீராக சேரும் இளைஞர்கள், 6 ஆண்டுகள் சேவையை நிறைவு செய்யும் போது 24 முதல் 27 வயதுக்குள் இருப்பார்கள். பொதுவாக இந்த வயதில்தான் பலர் திருமணம் மற்றும் குடும்ப வாழ்க்கை குறித்து சிந்திக்கத் தொடங்குவார்கள். எனவே கூடுதலாக வழங்கப்படும் 2 ஆண்டுகள் சேவைக் காலத்தின் போது திருமணம் செய்ய அனுமதி கிடைக்குமா என்பது முக்கியமான விவாதமாக மாறியுள்ளது.

#Cabinet has created a pathway for all #Agniveers to be absorbed into the Indian Defence Forces. As you know, 25% of Agniveers will enrolled in the Forces, based on merit. Previously, the Scheme envisaged that 75% of Agniveers would transition back into civilian life as disciplined and motivated youth. However, the remaining 75% will now be given an extended engagement period of two years under the scheme. Upon completion of this period, all the willing Agniveers will be enrolled in the #ArmedForces, subject to objective selection criteria. - Chief of Defence Staff, General N.S. Raja Subramani during the Cabinet Briefing #CabinetDecisions

— PIB India (@PIB_India) November 4, 2026

அக்னிவீர்களுக்கு இருக்கும் இரண்டு வாய்ப்புகள்

அக்னிவீர்களின் முதல் 4 ஆண்டுகள் சேவை நிறைவடைந்த பிறகு அவர்களுக்கு இரண்டு வழிகள் திறக்கப்படுகின்றன.

நிரந்தர ராணுவப் பணி (25%)

தேர்வு செய்யப்பட்ட 25 சதவீத அக்னிவீர்கள் நிரந்தர ராணுவப் பணியில் சேர்க்கப்படுவார்கள். அவர்களுக்கு வழக்கமான ராணுவ விதிமுறைகளின் கீழ் திருமணம் செய்ய அனுமதி வழங்கப்படும்.

கூடுதல் 2 ஆண்டுகள் சேவை (75%)

மீதமுள்ள 75 சதவீத அக்னிவீர்கள் சேவையை மேலும் 2 ஆண்டுகள் நீட்டிக்க விரும்பினால், பாதுகாப்பு அமைச்சகம் வெளியிடும் புதிய வழிகாட்டுதல்களைப் பின்பற்ற வேண்டியிருக்கும். இந்த வழிகாட்டுதல்களில்தான் திருமண அனுமதி தொடர்பான இறுதி முடிவு தெளிவாக அறிவிக்கப்படும் என்று எதிர்பார்க்கப்படுகிறது.

திருமண விதிகளில் மாற்றம் வருமா?

பாதுகாப்புத் துறையின் உயர்மட்ட வட்டாரங்கள் வழங்கிய தகவலின்படி, 4 ஆண்டுகளுக்கு மேல் சேவையில் தொடரும் அக்னிவீர்களுக்கான குடும்ப மற்றும் தனிப்பட்ட வாழ்க்கை தொடர்பான விதிமுறைகள் ஆய்வு செய்யப்பட்டு வருவதாக கூறப்படுகிறது.

ஆனால் தற்போதைக்கு எந்த அதிகாரப்பூர்வ மாற்றமும் அறிவிக்கப்படவில்லை. ஆரம்ப 4 ஆண்டுகள் சேவை காலத்தில் திருமணத் தடை தொடர்கிறது. ஆனால் கூடுதல் 2 ஆண்டுகள் சேவையின் போது சில தளர்வுகள் வழங்குவது குறித்து அரசு மற்றும் ராணுவ நிர்வாகம் பரிசீலித்து வருவதாக தகவல்கள் வெளியாகியுள்ளன.

அக்னிவீர்களுக்கு திருமண அனுமதி எப்போது?

அக்னிபத் திட்டத்தில் சேவை காலத்தை 6 ஆண்டுகளாக நீட்டிக்கும் வாய்ப்பு, ஆயிரக்கணக்கான அக்னிவீர்களின் எதிர்காலத்தை மாற்றக்கூடிய முக்கிய முடிவாக பார்க்கப்படுகிறது. அதே நேரத்தில், திருமணம் தொடர்பான விதிகளில் மாற்றம் ஏற்படுமா என்பது குறித்து அதிகாரப்பூர்வ அறிவிப்பே இறுதி முடிவைத் தெளிவுபடுத்தும். எனவே புதிய வழிகாட்டுதல்கள் வெளியாகும் வரை தற்போதைய விதிமுறைகளே நடைமுறையில் இருக்கும்.

மேலும் படிக்க - திருமணத்திற்கு ரெடியாவது எப்படி? கல்லூரியில் புதிய Course அறிமுகம்.. மாநில அரசு அறிவிப்பு