இனி மின்சார ரயில்களில் ஆட்டோமெட்டிக் கதவுகள்... உயிரிழப்புகளை தடுக்க சூப்பர் பிளான்

நாட்டின் பெரு நகரங்களில் பொது போக்குவரத்து என்பது மிக முக்கிய கட்டமைப்புகளில் ஒன்றாகும். அதிலும் மெட்ரோ சேவை தற்போது அதிநவீன மற்றும் அதிவிரைவு சேவையாக பார்க்கப்படுகிறது.

அதேபோல், புறநகர் ரயில் சேவையும் பெருநகரங்களில் தவிர்க்க முடியாது ஒன்று. சென்னை, மும்பை, கொல்கத்தா, ஹைதராபாத், புனே, டெல்லி உள்ளிட்ட நகரங்களில் புறநகர் ரயில் சேவை இயங்கி வருகிறது.

மேலும் படிக்க | பிரதமர் பதவிக்கு OK சொன்ன சோனிய காந்தி.. கோபத்தில் ராகுல்.. 25 ஆண்டுகளுக்கு பிறகு வெளிவந்த உண்மை

முக்கியத்துவம் வாய்ந்த மும்பை புறநகர் ரயில்

பிற நகரங்களை காட்டிலும் அதிகமான மக்கள் பயன்படுத்தும் ரயில் சேவை என்பது மும்பை புறநகர் ரயில்தான். மும்பை புறநகர் ரயில்வே இணையத்தளத்தில் உள்ள தகவலின்படி, குறைந்தபட்சம் தினமும் 70-80 லட்சம் பயணிகள் இதில் பயணிக்கின்றனர். சுமார் 400 கி.மீ., தூரத்திற்கு தினமும் 3 ஆயிரம் ரயில் சேவைகளுக்கும் மேல் இயக்கப்படுகின்றன. மும்பைக்கு அடுத்த இடத்தில் சென்னை உள்ளது.

தானியங்கி கதவுகளுடன் ரயில் பெட்டி

அந்த வகையில், முக்கியத்துவம் வாய்ந்த இந்த மும்பை புறநகர் ரயிலில் முக்கிய மாற்றம் ஏற்பட இருக்கிறது. அதாவது, மும்பையில் முதல்முறையாக ஏசி அல்லாத புறநகர் ரயில்களில் தானியங்கி கதவுகள் பொருத்தப்பட இருப்பதாக கடந்த நவம்பர் 7ஆம் தேதி அன்று Times of India பத்திரிகை செய்தி வெளியிட்டுள்ளது.

இதையொட்டி, சென்னையின் ஒருங்கிணைந்த ரயில் பெட்டி தொழிற்சாலையில் (ICF) 12 பெட்டிகளை கொண்ட ரயில் தயாரிக்கப்பட்டுள்ளது. இது மக்களின் பயன்பாட்டுக்கு வருவதற்கு முன்பு, பாதுகாப்பு மற்றும் செயல்பாட்டுச் சோதனைகளுக்கு உட்படுத்தப்படும் என தெரிவிக்கப்பட்டுள்ளது.

2025இல் நடந்த சம்பவம்

கடந்த 2025ஆம் ஆண்டு ஜூன் 9ஆம் தேதி அன்று நடந்த பயங்கர விபத்துதான் புறநகர் ரயில் பெட்டிகளில் கதவுகளை பொருத்த வேண்டும் என்ற கோரிக்கையை வலுப்படுத்தியது. எதிர் திசைகளில் சென்றுகொண்டிருந்த 2 ரயில்களில், பயணிகள் பலர் வாசலுக்கு வெளியே தொங்கியபடி சென்றுள்ளனர், அப்போது ரயில்கள் ஒன்றுக்கு ஒன்று எதிர்திசையில் செல்லும்போது 5 பயணிகள் தண்டவாளத்தில் தவறிவிழுந்து உயிரிழந்தனர். பலர் காயமடைந்தனர்.

மேலும் படிக்க | 60 நாளில் ரூ.9 லட்சம்.. தூங்கியே சம்பாதித்த மும்பை பெண்.. எப்படி தெரியுமா?

ரயிலில் ஏற்படும் உயிரிழப்புகள்

The Indian Express பத்திரிகையில் வெளியிடப்பட்ட அரசு ரயில்வே காவல்துறை தரவுகளின்படி:

• புறநகர் ரயில்களில் 2025ஆம் ஆண்டு 2,287 பேர் உயிரிழந்தனர்.
• 2024ஆம் ஆண்டு 2,468 பேர் உயிரிழந்தனர்.
• 2024-ஐ விட 2025இல் 7% உயிரிழப்பு குறைந்துள்ளது, சரா்சரியாக தினமும் ஆறுக்கும் மேற்பட்டோர் தொடர்ந்து உயிரிழக்கின்றனர் என்பதை நாம் புரிந்துகொள்ள முடிகிறது.
• இந்த உயிரிழப்புகள் அனைத்தும் வாசல்களில் தொங்கியபடி இருந்ததால் நடந்ததுவை அல்ல, இதில் பல காரணங்களால் ஏற்படும் மரணங்களும் உள்ளடக்கப்பட்டுள்ளன.
• 2025இல் 2,287 உயிரிழப்புகளில் 525 பேர் ஓடும் ரயில்களில் இருந்து விழுந்த பயணிகள். 1,063 பேர் ரயில் தண்டவாளங்களை கடக்கும்போது உயிரிழந்ததால் ஏற்பபட்டன.
• 2024ஆம் ஆண்டில் ரயில்களில் விழுந்து 570 பேர் உயிரிழந்துள்ளனர். இதனால், ஏசி அல்லாத புறநகர் ரயில் பெட்டிகளில் கதவுகளை பொருத்துவது இந்த உயிரிழப்புகளை தடுக்க முக்கிய தீர்வாக இருக்கும்.

காற்றோட்டம் எப்படி இருக்கும்...?

• இதற்கு முன்னர், ஒரு சில புறநகர் ரயில் சேவைகளில் ஏசி அல்லாத பெட்டிகளுக்கு கதவுகள் பொருத்தப்பட்டன. ஆனால் அவற்றில் காற்றோட்டம், சென்சார் கோளாறுகள் உள்ளிட்டவை சிக்கலாக இருந்தன.
• தற்போது கொண்டுவரப்பட்ட பெட்டிகளில் ரயில் பயணத்தின்போது கதவுகள் மூடப்பட்டு, நிலையங்களை சென்றடைந்ததும் கதவுகல் திறக்கும் வகையில் வடிவமைக்கப்பட்டுள்ளது. காற்றோட்டத்திற்காக லுவர் கதவுகள், மேற்கூரை வென்டிலேட்டர்கள் அமைக்கப்பட்டுள்ளன.
• அதேநேரத்தில் பெட்டிகளுக்கு இடையே பயணிக்கும் வசதி செய்யப்பட்டுள்ளது. அதாவது ஒரு பெட்டியில் ஏறி கூட்டம் இல்லாத பெட்டிக்கும் நீங்கள் நடந்தே செல்லலாம். சோதனைகள், பாதுகாப்பு சான்றிதழ் சார்ந்த பணிகள் முடிந்த பிறகே இது மக்களின் பயன்பாட்டுக்கு வரும்.

மேலும் படிக்க | காங்கிரஸுக்கு காத்திருக்கும் ஆப்பு! வரலாறு காணாத அளவில் குறைந்த நன்கொடை.. என்ன காரணம்?