சென்னையில் செப். 29 வரை இந்த இடங்களுக்கு தண்ணீர் வராது... முழு விவரம் இதோ

10 நாட்கள் தண்ணீர் வராது

சென்னை சோழிங்கநல்லூர் வார்டு 199-க்குட்பட்ட தமிழ்நாடு வீட்டுவசதி வாரிய பிரதான சாலையில் மழைநீர் வடிகால் அமைக்கும் பணி நடைபெறுகிறது. இதனால், பிரதான குடிநீர் குழாயை மாற்றியமைக்கப்படும் பணி நடைபெறுகிறது. இதனால் இன்று முதல் (செப். 20) வரும் செப்டம்பர் 29ஆம் தேதிவரை 10 நாட்களுக்கு குழாய் மூலம் குடிநீர் விநியோகம் நிறுத்தப்படுவதாக சென்னை பெருநகர் குடிநீர் வழங்கல் மற்றும் கழிவுநீரகற்று வாரியம் தெரிவித்திருந்தது.

நெம்மேலி ஆலை தற்காலிக நிறுத்தம்

அதேபோல், நெம்மேலியில் இயங்கி வரும் கடல்நீரை குடிநீராக்கும் ஆலையில் இருந்து வரும் 1,400 மி.மீ. விட்டம் கொண்ட பிரதான குழாய் மாற்றியமைக்கப்படுவதால், அங்கிருந்து வரும் நீர் விநியோகம் முழுமையாக நிறுத்தப்படும். இந்த ஆலையின் திறன் நாள் ஒன்றுக்கு 150 மில்லியன் லிட்டராகும்.

பாதிக்கப்படும் பிரதான பகுதிகள்

சென்னை மாநகராட்சியின் மண்டலம் 13 மற்றும் மண்டலம் 14 உட்பட்ட வேளச்சேரி, பெருங்குடி, அடையாறு, புழுதிவாக்கம், உள்ளகரம், மடிப்பாக்கம், பள்ளிக்கரணை மற்றும் ஜல்லடியன்பேட்டை ஆகிய பகுதிகளில் உள்ள சில இடங்களில் குடிநீர் விநியோகம் தடைபடும்.

செம்பரம்பாக்கத்தில் இருந்து மாற்று ஏற்பாடு

நெம்மேலி ஆலையில் இருந்து குடிநீர் விநியோகம் தடைபடுவதால், பாதிக்கப்பட்ட பகுதிகளுக்கு மாற்று ஏற்பாடாக செம்பரம்பக்கம் குடிநீர் சுத்திகரப்பு நிலையத்தில் இருந்து குடிநீர் வழங்க சென்னை குடிநீர் வாரியம் திட்டமிட்டுள்ளது. இதன் திறன் 530 MLD ஆகும்.

லாரி குடிநீர் சேவை அளிக்கப்படும்

பொதுமக்கள் தங்களின் அவசரத் தேவைகளுக்கு குடிநீர் வாரிய இணையத்தளம் மூலம் லாரி குடிநீரை முன்பதிவு செய்து பெற்றுக்கொள்ளலாம் என அறிவுறுத்தப்பட்டுள்ளது. பொதுக் குழாய்கள் மற்றும் தெருக்களில் உள்ள தொட்டிகளுக்கு வழக்கம்போல் தடையின்றி லாரிகள் மூலம் குடிநீர் வழங்கப்படும்.