சென்னை மக்கள் கவனத்திற்கு... செப். 19இல் மக்கள் குறைதீர் முகாம் - மிஸ் பண்ணாதீங்க

ஒவ்வொரு மாதமும் குறைதீர் முகாம்

தமிழ்நாடு அரசின் அறிவிப்பின்படி, பொது விநியோகத் திட்டத்தின் பயன்களை குடிமக்கள் எளிதில் பெறும் வகையில் தமிழ்நாடு முழுவதும் ஒவ்வொரு வட்டத்திலும் மக்கள் குறைதீர் முகாம் ஒவ்வொரு மாதமும் நடைபெறும்.

சென்னை மாநகராட்சி ஆணையர் அறிவிப்பு

அதன்படி நடப்பு செப்டம்பர் மாதத்திற்கான மாதாந்திர பொது விநியோகத் திட்ட மக்கள் குறைதீர் முகாம் சென்னையில் உள்ள உணவுப் பொருள் வழங்கல் மற்றும் நுகர்வோர் பாதுகாப்புத் துறையின் 19 மண்டல உதவி ஆணையாளர் அலுவலகங்களில் வரும் சனிக்கிழமை (செப். 19) அன்று பகல் 10.00 மணி முதல் பிற்பகல் 1.00 மணி வரை நடைபெறும் என சென்னை மாநகராட்சி ஆணையர் அறிவித்துள்ளது.

என்னென்ன சேவைகள் கிடைக்கும்...?

இந்த குறைதீர் முகாமில் குடும்ப அட்டைகளில் பெயர் சேர்த்தல், பெயர் நீக்கம், முகவரி மாற்றம், கைபேசி எண் பதிவு, கைபேசி எண் மாற்றம் செய்தல் உள்ளிட்ட பொது விநியோகத் திட்டம் தொடர்பான சேவைகள் மேற்கொள்ளப்படும். மேலும், நியாய விலைக் கடைகளில் பொருள் பெற நேரில் வருகை தர இயலாத மூத்த குடிமக்கள் உள்ளிட்டோருக்கு அங்கீகாரச் சான்று வழங்கப்படும்.

புகார்களும் அளிக்கலாம்

பொது விநியோகக் கடைகளின் செயல்பாடுகள், தனியார் சந்தையில் விற்கப்படும் பொருட்கள் அல்லது சேவைகளில் குறைபாடுகள் குறித்த புகார்கள் ஏதேனும் இருப்பின் அவற்றை பொதுமக்கள் இம்முகாமில் தெரிவித்தால் குறைகளை விரைந்து தீர்வு செய்ய உரிய நடவடிக்கை எடுக்கப்படும்.

மொபைல் கட்டாயம் தேவை

மேலும் இந்த சேவைகள் பதிவு செய்யப்பட்ட கைப்பேசி எண்களில் பெறப்படும் ஒருமுறை கடவுச்சொல் வழியாக (OTP) மட்டுமே மேற்கொள்ளப்படும் என்பதால் குடும்ப அட்டைதாரர்கள் உங்களின் பதிவு செய்யப்பட்ட கைபேசியுடன் மண்டல அலுவலகத்தை தொடர்பு கொள்ள வேண்டும் என தெரிவிக்கப்பட்டுள்ளது. சென்னையில் உள்ள 19 மண்டல அலுவலகப் பகுதிகளில் உள்ள குடும்ப அட்டைதாரர்கள் இச்சேவையினை பயன்படுத்திக் கொள்ளலாம். செப்டம்பர் 19ஆம் தேதி அன்று தமிழ்நாடு முழுவதும் (மதுராந்தகம், தாராபுரம் தவிர்த்து) ரேசன் கடை eKYC நடைமுறைக்கான சிறப்பு முகாம் நடைபெற இருப்பது குறிப்பிடத்தக்கது.