ரூ.1,700 கோடி முதலீடு... அடையார் ஆனந்த பவனை வாங்கிய உதய் சங்கர், ஜேம்ஸ் முர்டோக்... யார் இவர்கள்? Explained
சென்னையின் பிரபல அடையார் ஆனந்த பவன் (A2B) உணவக நிறுவனத்தின் பெரும்பான்மைப் பங்குகளை ஜேம்ஸ் முர்டோக், உதய் சங்கரின் Bodhi Tree Systems நிறுவனம் ரூ.1700 கோடிக்கு வாங்க ஒப்பந்தம் செய்துள்ளது. இவர் உதய் சங்கர் புதிய தலைவராகிறார்.
Published: Nov 14, 2026, 21:23 IST
| Updated: Nov 14, 2026, 21:43 IST
சென்னையை தலைமையிடமாகக் கொண்டு செயல்படும் பிரபல உணவக நிறுவனம் அடையார் ஆனந்த பவன் (A2B). இந்த நிறுவனத்தின் பெரும்பான்மையாபங்குகளை வாங்க Bodhi Tree Systems நிறுவனம் ஒப்பந்தம் செய்துள்ளது.
சுமார் 180 மில்லியன் அமெரிக்க டாலர் மதிப்பிலான இந்த முதலீடு இந்திய உணவகத் துறையில் முக்கியமான ஒப்பந்தமாகப் பார்க்கப்படுகிறது. இந்திய ரூபாய் மதிப்பில் இந்த ஒப்பந்தத்தின் மதிப்பு ரூ.1,600 கோடி முதல் ரூ.1,700 கோடி வரை இருக்கும்.
அந்த வகையில், A2B நிறுவனத்தை இவ்வளவு பெரிய தொகை கொடுத்து பெற ஒப்பந்தம் செய்திருக்கும் Bodhi Tree நிறுவனத்தின் பின்னணியில் இருப்பவர்கள் யார்? A2B நிறுவனத்தின் உரிமையாளர் கட்டமைப்பில் என்ன மாற்றம் ஏற்படப்போகிறது? என்பதை இங்கு விரிவாகப் பார்க்கலாம்.
Bodhi Tree நிறுவனத்தின் ஒப்பந்தம்
- தமிழ்நாட்டில் குறிப்பாக சென்னை, கோவை, மதுரை உள்ளிட்ட பல்வேறு நகரங்களில் பிரபலமாகச் செயல்பட்டு வரும் உணவக நிறுவனம்தான் அடையார் ஆனந்த பவன். தென்னிந்திய உணவுகள், இனிப்புகள், கார வகைகள் என பல்வேறு உணவுப் பொருட்களை விற்பனை செய்து வரும் நிறுவனம்தான் A2B.
- 1979ஆம் ஆண்டு சென்னையின் வண்ணார்பேட்டையில் A2B தொடங்கப்பட்டது. பின்னர் அடையாறில் மற்றொரு கிளையைத் தொடங்கியது. அந்த கிளையின் வெற்றியைத் தொடர்ந்து அடையார் ஆனந்த பவன் என்ற பெயரில் வளர்ச்சியடைந்தது. இதன் நிறுவனர்கள் கே.டி. சீனிவாச ராஜா மற்றும் கே.டி. வெங்கடேசன் ஆவர்.
- குடும்பத் தொழிலாக இந்த நிறுவனத்தை தொடங்கி பின்னர் பெரிய உணவக செயின்களை உருவாக்கினர். தற்போது இந்தியாவில் A2B 160 கிளைகளையும், வெளிநாடுகளில் 30க்கும் மேற்பட்ட கிளைகளையும் கொண்டுள்ளது.
- சுமார் 15 ஆயிரத்திற்கும் மேற்பட்ட ஊழியர்கள் இந்நிறுவனத்தில் பணியாற்றி வருவதாக தகவல்கள் தெரிவிக்கின்றன.
- இந்தச் சூழலில், அமெரிக்காவைச் சேர்ந்த முதலீட்டு நிறுவனமான Bodhi Tree Systems, A2B நிறுவனத்தில் பெரும்பான்மையான பங்குகளை ரூ.1700 கோடிக்கு முதலீடு செய்துள்ளது. இருப்பினும், எத்தனை சதவீதப் பங்குகள் விற்கப்பட்டுள்ளன, நிறுவனத்தின் இறுதியான மதிப்பீடு என்ன என்பது குறித்த விவரங்கள் அதிகாரப்பூர்வமாக வெளியிடப்படவில்லை.
ஜேம்ஸ் முர்டோக் பின்னணி என்ன?
- Bodhi Tree Systems நிறுவனத்தின் இந்த முதலீட்டின் பின்னணியில் இருப்பவர்களில் ஒருவர் ஜேம்ஸ் முர்டோக். உலகப் புகழ்பெற்ற ஊடகத் தொழிலதிபர் ரூபர்ட் முர்டோக்கின் இளைய மகன்தான் இவர்.
- ரூபர்ட் முர்டோக், Fox Corporation, News Corp உள்ளிட்ட உலகளாவிய ஊடக நிறுவனங்களின் வளர்ச்சியில் முக்கிய பங்கு வகித்தவர் ஆவார். அவரது மகனான ஜேம்ஸ் முர்டோக்கும் ஊடகத் துறையில் நீண்ட நெடிய அனுபவம் கொணஅடவர்.
- 21st Century Fox நிறுவனத்தின் சிஇஓ ஆக இருந்துள்ளார். அதற்கு முன் Sky மற்றும் Star உள்ளிட்ட ஊடக நிறுவனங்களிலும் முக்கியப் பொறுப்புகளை வகித்து வந்துள்ளார்.
- Lupa Systems என்ற முதலீட்டு நிறுவனத்தை பின்னர் தொடங்கிய அவர் ஊடகம், தொழில்நுட்பம் உள்ளிட்ட துறைகளில் முதலீடுகளை மேற்கொண்டு வருகிறார்.
யார் இந்த உதய் சங்கர்?
- இந்திய ஊடகத்துறையில் முக்கிய ஆளுமைகளில் ஒருவர்தான் உதய் சங்கர். பத்திரிகையாளராகத் தனது வாழ்க்கையைத் தொடங்கிய இவர், பின்னர் தொலைக்காட்சி மற்றும் டிஜிட்டல் ஊடகத் துறையில் மிகப்பெரிய வளர்ச்சியை உண்டாக்கியவர்.
- TV Today குழுமத்தில் பணியாற்றியபோது, இந்தியாவின் முதல் 24 மணி நேர இந்தி செய்தி தொலைக்காட்சியான Aaj Tak உருவாக்கத்தில் இவரது பங்கு முக்கியத்துவம் வாய்ந்ததாக கூறப்படுகிறது.
- பின்னர் Star India நிறுவனத்தின் தலைமைச் செயல் அதிகாரியாகப் பொறுப்பேற்றார். இவரது தலைமையில் Star India பல்வேறு மாற்றங்களைக் கண்டது. குறிப்பாக கிரிக்கெட் ஒளிப்பரப்பு, கபடி போட்டிகள், பிராந்திய மொழி நிகழ்ச்சிகளுக்கு அதிக முக்கியத்துவம் கொடுக்கப்பட்டது.
- அதேபோல், Hotstar டிஜிட்டல் ஸ்ட்ரீமிங் தளத்தின் உருவாக்கத்திலும் இவர் முக்கியமான பங்களிப்பை அளித்தவர்.
- அதன்பின், 21st Century Fox Asia மற்றும் Walt Disney Asia Pacific ஆகிய நிறுவனங்களிலும் தலைமைப் பொறுப்புகளை வகித்தார். தற்போது JioStar நிறுவனத்தின் துணைத் தலைவராகவும் செயல்படுகிறார்.
Bodhi Tree நிறுவனத்தின் எதிர்கால திட்டம் என்ன?
- ஜேம்ஸ் முர்டோக்கும் உதய் சங்கரும் இணைந்து 2021ஆம் ஆண்டு Bodhi Tree Systems என்ற முதலீட்டு நிறுவனத்தை உருவாக்கினார். வளர்ச்சிக்கான வாய்ப்புகளை கொண்ட நுகர்வோர் சார்ந்த நிறுவனங்களில் முதலீடு செய்து, அவற்றை அடுத்த கட்டத்திற்கு எடுத்துச் செல்வதே இதன் முக்கிய நோக்கமாகும்.
- இதற்கு முன்னர், ALLEN Career Institute நிறுவனத்தின் 600 மில்லியன் டாலர் முதலீடு செய்து 36% பங்குகளைக் கைப்பற்றியது. மேலும், Reliance குழுமத்துடன் இணைந்து இந்தியாவின் ஊடகம் மற்றும் பொழுதுபோக்கு துறையிலும் முக்கிய முதலீடுகளை மேற்கொண்டுள்ளது.
- தற்போது A2B நிறுவனத்துடனான ஒப்பந்தம் மூலம் அதன் உணவகங்களையும் பேக்கேஜ் செய்யப்பட்ட உணவுப் பொருட்களையும் இந்தியா முழுவதும், வெளிநாடுகளிலும் விரிவுபடுத்தத் திட்டமிட்டுள்ளது.
- தற்போதுள்ள சமையலறைகள், உற்பத்தி மையங்கள் நவீனப்படுத்துதல், டிஜிட்டல் தொழில்நுட்பத்தை மேம்படுத்துதல், புதிய சந்தைகளில் விரிவாக்கம் செய்தல் ஆகியவற்றிலும் கவனம் செலுத்தப்பட உள்ளது. அதேநேரத்தில், உதய் சங்கர் A2B நிறுவனத்தின் புதிய இயக்குநர் குழுவின் தலைவராகப் பொறுப்பேற்க உள்ளார்.
- எதிர்காலத்தில் பங்குச்சந்தையில் பட்டியிடுவதற்குத் தகுதியான நிறுவனமாக A2B-யை உருவாக்குவதும் இந்தக் கூட்டணியின் முக்கிய டார்கெட்களில் ஒன்றாகும். இதன்மூலம், தமிழ்நாட்டில் குடும்பத் தொழிலாகத் தொடங்கப்பட்ட A2B நிறுவனம் சர்வதேச அளவில் இந்திய உணவு நிறுவனமாக வளர்வதற்கான புதிய பாதையில் பயணிக்கத் தொடங்கியிருக்கிறது.