தாராபுரம் இடைத்தேர்தல்: சூடுபிடிக்கும் களம்... முதல்வர் விஜய் இன்று பரப்புரை, ஏற்பாடுகள் தீவிரம்

சென்னை: தமிழகத்தில் அக்டோபர் 6ஆம் தேதி நடைபெறவுள்ள சட்டமன்ற இடைத்தேர்தலை முன்னிட்டு, திருப்பூர் மாவட்டம் தாராபுரம் தொகுதியில் போட்டியிடும் 'தமிழக வெற்றிக் கழகம்' (TVK) வேட்பாளர் சத்யபாமாவுக்காக, அக்கட்சியின் தலைவரும் தமிழக முதல்வருமான சி. ஜோசப் விஜய் இன்று (செப்டம்பர் 30, புதன்கிழமை) பிரச்சாரம் மேற்கொள்ளவுள்ளார்.

தமிழகத்தில் இடைத்தேர்தலுக்கான பிரச்சாரம் சூடுபிடித்துள்ள நிலையில், பல்வேறு கட்சித் தலைவர்களும் உச்சகட்ட பரப்புரையில் ஈடுபட்டுள்ளனர். மதுராந்தகத்தில் தனது பரப்புரையில் திமுக மற்றும் பிற கட்சிகளை கடுமையாக சாடிப் பேசிய முதல்வர் விஜய் இன்றைய பிரச்சாரத்தில் என்ன பேசவுள்ளார் என்பது குறித்த ஆர்வம் அதிகரித்துள்ளது.

தவெக வேட்பாளர் சத்யபாமா

தாராபுரம் தொகுதி இடைத்தேர்தலில் தவெக வேட்பாளராக போட்டியிடும் சத்யபாமா முதலில் அதிமுக வேட்பாளராக இத்தொகுதியில் வெற்றி பெற்றார். பின்னர் சட்டமன்ற உறுப்பினர் பதவியை ராஜினாமா செய்துவிட்டு தமிழக வெற்றிக் கழகத்தில் இணைந்ததால், தற்போது இங்கு இடைத்தேர்தல் நடைபெறுகிறது. இத்தேர்தலில் மொத்தம் 22 வேட்பாளர்கள் களத்தில் உள்ளனர். முக்கியக் கட்சிகள் தங்கள் பிரச்சாரத்தைத் தீவிரப்படுத்தியுள்ளன.

முதல்வர் விஜய் பரப்புரை

• முதல்வர் விஜய் பங்கேற்கும் பொதுக்கூட்டத்திற்காக, தாராபுரம் - உடுமலைப்பேட்டை சாலையில் உள்ள கொண்டரசம்பாளையம், மாருதி நகரில் 54 ஏக்கர் பரப்பளவில் மைதானம் தயார் செய்யப்பட்டுள்ளது.
• அவர் பேசுவதற்கான மேடையாகப் பயன்படுத்தப்படவுள்ள பேருந்து ஒன்று கூட்டரங்கின் அருகே நிறுத்தப்பட்டுள்ளது. 
• அமைச்சர்கள் மற்றும் கட்சியின் மூத்த நிர்வாகிகளுக்கு இருக்கை வசதிகளும், தன்னார்வலர்கள் மற்றும் பொதுமக்களுக்குத் தனித்தனிப் பகுதிகளும் ஒதுக்கப்பட்டுள்ளன.
• மைதானம் முழுவதும் நிகழ்ச்சிகளைத் திரையிட 10-க்கும் மேற்பட்ட பெரிய எல்.இ.டி (LED) திரைகள் அமைக்கப்பட்டுள்ளன.

மேலும் படிக்க | Tamil News LIVE : முதலமைச்சர் விஜய் தாராபுரம் பிரச்சாரம், சொத்து வரி செலுத்த கடைசி நாள் - இன்றைய முக்கிய செய்திகள்

5,000 QR பாஸ்கள் மட்டுமே

தவெக பொதுச்செயலாளரும் தமிழக ஊரக வளர்ச்சித் துறை அமைச்சருமான என். ஆனந்த், இந்த நிகழ்வில் கலந்துகொள்ள கியூஆர் (QR) பாஸ் வைத்திருக்கும் 5,000 பேருக்கு மட்டுமே அனுமதி அளிக்கப்படும் என்று தெரிவித்தார். கியூஆர் குறியீடு (QR code) கொண்ட பாஸ் வைத்திருப்பவர்கள் மட்டுமே அனுமதிக்கப்படுவார்கள் என்று செவ்வாய்க்கிழமை மாலை அவர் அறிவித்தார்.

இதுகுறித்து அவர் வெளியிட்ட அறிக்கையில்,

"தாராபுரம் அருகே உள்ள சித்ரவுத்தன்பாளையம் கிராமத்தில் உள்ள மாருதி நகரில், புதன்கிழமை பிற்பகல் 3 மணியளவில் விஜய் அவர்களின் பிரச்சாரக் கூட்டம் நடைபெறவுள்ளது. கியூஆர் குறியீடு அடங்கிய நுழைவுச் சீட்டுகளைப் பெற்ற 5,000 பேர் மட்டுமே இந்நிகழ்ச்சியில் கலந்துகொள்ள அனுமதிக்கப்படுவார்கள்; வேறு யாருக்கும் அனுமதி அளிக்கப்படாது" என்று குறிப்பிட்டுள்ளார்.

முதல்வர் விஜய் மதியம் வாக்கில் சென்னையில் இருந்து தனி விமானம் மூலம் புறப்பட்டு, பிற்பகல் 1 மணி அளவில் கோயம்புத்தூர் விமான நிலையத்தை வந்தடைவார் என்று திட்டமிடப்பட்டுள்ளது. அங்கிருந்து கார் மூலம் கூட்டரங்கிற்குச் செல்லும் அவர், பிற்பகல் 3 மணி அளவில் அங்கு வருவார் என எதிர்பார்க்கப்படுகிறது. கூட்டத்தில் உரையாற்றிய பிறகு, அவர் சாலை வழியாகக் கோயம்புத்தூர் திரும்பி, அங்கிருந்து விமானம் மூலம் சென்னைக்குத் திரும்புவார்.

மேலும் படிக்க | தூத்துக்குடி வேலைவாய்ப்பு : டிகிரி முடித்த பெண்களே விண்ணப்பிக்கலாம்! மாத சம்பளம் ரூ.12000

தாராபுரத்தில் போக்குவரத்து மாற்றங்கள்

முதல்வரின் வருகையை முன்னிட்டு தாராபுரத்தில் போக்குவரத்து மாற்றங்கள் செய்யப்பட்டுள்ளன. கனரக வாகனங்கள் நகருக்குள் நுழையத் தடை விதிக்கப்பட்டுள்ளது. மற்ற வாகனங்கள் மாற்றுப் பாதையில் திருப்பி விடப்படுகின்றன. மேலும் முக்கிய இடங்களில் இரும்புத் தடுப்புகள் அமைக்கப்பட்டுள்ளன.

முதல்வரின் பயணப் பாதையில் உள்ள தாராபுரம் - பல்லடம் நான்கு வழிச்சாலையில், பள்ளிகள், கல்லூரிகள் மற்றும் கிராமப்புற பேருந்து நிறுத்தங்களுக்கு அருகிலுள்ள பகுதிகள் உட்பட சுமார் 50 இடங்களில் உள்ள வேகத்தடைகள் அகற்றப்பட்டு வருகின்றன.

நகரப் பகுதியிலும், மாருதி நகரில் உள்ள கூட்டரங்குப் பகுதியிலும் காவல்துறையினர் பாதுகாப்பை பலப்படுத்தியுள்ளனர். கோயம்புத்தூர் மேற்கு மண்டல காவல் துறைத் தலைவர் (IG) ரம்யா பாரதி தலைமையில், திருப்பூர், கோயம்புத்தூர், நீலகிரி மற்றும் ஈரோடு மாவட்டங்களைச் சேர்ந்த 3,000-க்கும் மேற்பட்ட காவலர்கள் பாதுகாப்புப் பணியில் ஈடுபடுத்தப்பட்டுள்ளனர். செவ்வாய்க்கிழமை அன்று, கோயம்புத்தூர் சரகக் காவல் துறைத் துணைத் தலைவர் (DIG) சாமிநாதன் அங்குள்ள பாதுகாப்பு ஏற்பாடுகளை ஆய்வு செய்தார்.

தவெக வேட்பாளம் சத்யபாமா ஒரு புதிய கட்சியின் சார்பில் போட்டியிட்டுத் தனது தொகுதியைத் தக்கவைக்க முயல்வதால், இந்த இடைத்தேர்தல் அனைவரின் கவனத்தையும் ஈர்த்துள்ளது. தேர்தல் பிரச்சாரம் இறுதிக்கட்டத்தை எட்டியுள்ள நிலையில், அவரது எதிர்ப்பாளர்களும் தொகுதி முழுவதும் தீவிர வாக்கு சேகரிப்பில் ஈடுபட்டு வருகின்றனர்.

மேலும் படிக்க |  Swiggy, Zomato டெலிவரி ஊழியர்களுக்கு தமிழ்நாடு அரசின் ஜாக்பாட்: ரூ.5 லட்சம் வரை உதவித்தொகை