Madurantakam, Dharapuram By-election: தமிழ்நாடு சட்டப்பேரவை தேர்தல் வாக்குப்பதிவு கடந்த ஏப்ரல் 23ஆம் தேதி நடைபெற்றது. மே 4ஆம் தேதி வாக்கு எண்ணிக்கை நடைபெற்று 108 இடங்களை வென்று தவெக தனிப்பெரும் கட்சியாக உருவெடுத்தது.
திமுகவின் கூட்டணியில் தேர்தலை சந்தித்த காங்கிரஸ் (5), விசிக (2), சிபிஐ (2), சிபிஎம் (2), ஐயூஎம்எல் (2) உள்ளிட்ட கட்சிகள் தவெக ஆட்சியமைக்க ஆதரவு அளித்தது. இதில் சிபிஐ, சிபிஎம் மட்டும் அமைச்சரவையில் இடம்பெறவில்லை. அதேநேரத்தில், திமுக 59 இடங்களிலும், அதிமுக 47 இடங்களிலும் தனித்து வெற்றி கண்டது.
இந்தச் சூழலில், அதிமுக சார்பில் போட்டியிட்டு வென்ற மதுராந்தகம் எம்எல்ஏ மரகதம் குமரவேல், தாராபுரம் எம்எல்ஏ சத்யபாமா, பெருந்துறை எம்எல்ஏ ஜெயக்குமார், அம்பாசமுத்திரம் எம்எல்ஏ இசக்கி சுப்பையா, கரூர் எம்எல்ஏ எம்.ஆர். விஜயபாஸ்கர், விராலிமலை எம்எல்ஏ சி. விஜயபாஸ்கர் ஆகிய 6 பேர் தங்களின் பொறுப்பை ராஜினாமா செய்து தவெகவில் தங்களை இணைத்துக்கொண்டனர். திருச்சி கிழக்கு தொகுதியை முதலமைச்சர் விஜய்யும் ராஜினாமா செய்ய மொத்தம் 7 தொகுதிகள் காலியானதாக அறிவிக்கப்பட்டது.
இந்தச் சூழலில், மதுராந்தகம், தாராபுரம் தொகுதிகளில் மட்டும் இடைத்தேர்தல் அறிவிக்கப்பட்டுள்ளது. மற்ற 5 தொகுதிகளிலும் வெற்றிபெற்ற எம்எல்ஏக்கள் மீது தேர்தல் வழக்குகள் நீதிமன்றத்தில் நிலுவையில் இருப்பதால் இந்த 2 தொகுதிகளில் மட்டும் தேர்தல் ஆணையம் இடைத்தேர்தலை அறிவித்தது. மதுராந்தகம், தாராபுரம் ஆகிய இரண்டும் தனித் தொகுதிகள் ஆகும். அக்டோபர் 6ஆம் தேதி தேர்தல் வாக்குப்பதிவும், அக்டோபர் 9ஆம் தேதி வாக்கு எண்ணிக்கையும் நடைபெற இருக்கிறது.
நேற்று முதல் (செப். 9) வேட்புமனு தாக்கல் செய்ய அனுமதிக்கப்பட்ட நிலையில், வரும் செப். 16ஆம் தேதிதான் கடைசி நாளாகும். இடைத்தேர்தல் அறிவிக்கப்பட்டுள்ள மதுராந்தகம், தாராபுரம் தொகுதிகளில் ஆளும் தவெக, பிரதான எதிர்க்கட்சியான திமுக மற்றும் இந்த 2 தொகுதிகளில் வெற்றிபெற்ற அதிமுக களம் இறங்குகின்றன. மும்முனை போட்டி நிலவும் சூழலில், நாம் தமிழர் கட்சியும் வேட்பாளர்களை அறிவிக்க அதிக வாய்ப்புள்ளது. தற்போது அறிவிக்கப்பட்டுள்ள வேட்பாளர்கள் யார் யார் என்பதை இங்கு விரிவாக காணலாம்.
| கட்சி | வேட்பாளர் பெயர் |
| தவெக | மரகதம் குமரவேல் |
| திமுக | ஐ. பரந்தாமன் |
| அதிமுக | கணிதா சம்பத் |
| கட்சி | வேட்பாளர் பெயர் |
| தவெக | சத்யபாமா |
| திமுக | சுகன்யா |
| அதிமுக | கே. பானுமதி |
அந்த வகையில், ஏற்கெனவே ஆளும் தவெக மற்றும் திமுக தங்களின் வேட்பாளர்களை அறிவித்துவிட்டன. குறிப்பாக அதிமுகவில் வென்று, பின்னர் தங்களின் எம்எல்ஏ பதவியை ராஜினாமா செய்து தவெகவில் இணைந்தவர்களுக்கே அக்கட்சி வாய்ப்பளித்துள்ளது. தவெக சார்பில் மதுராந்தகம் தொகுதியில் மரகதம் குமரவேல் மற்றும் தாராபுரம் தொகுதியில் சத்யபாமா போட்டியிடுகின்றனர்.
— TVK Vijay (@TVKVijayHQ) September 10, 2026
திமுக சார்பில் மதுராந்தகத்தில் ஐ. பரந்தாமன் களமிறக்கப்பட்டார். தாராபுரம் தொகுதியில் வழக்கறிஞர் சுகன்யா வேட்பாளராக அறிவிக்கப்பட்டார்.
கழகத் தலைவர் திரு மு.க.ஸ்டாலின் அவர்களை நடைபெற உள்ள சட்டப்பேரவை இடைத்தேர்தலில் மதுராந்தகம் (தனி), தாராபுரம் (தனி) ஆகிய தொகுதிகளில் கழக வேட்பாளர்களாக அறிவிக்கப்பட்ட வழக்கறிஞர் இ.பரந்தாமன், வழக்கறிஞர் திருமதி எஸ்.சுகன்யா ஆகியோர் இன்று (10.9.2026), காலை, அண்ணா அறிவாலயத்தில் உள்ள கழக… pic.twitter.com/rJEavRasai
— DMK (@arivalayam) September 10, 2026
இந்தச் சூழலில், அதிமுகவும் அதன் வேட்பாளர்களை களமிறக்கி உள்ளது. அதிமுக பொதுச்செயலாளர் எடப்பாடி பழனிசாமி வேட்பாளர் பட்டியலை வெளியிட்டுள்ளார்.
மதுராந்தகம், தாராபுரம் சட்டமன்றத் தொகுதிகளுக்கான இடைத் தேர்தல்-2026 அனைத்திந்திய அண்ணா திராவிட முன்னேற்றக் கழக வேட்பாளர்கள்
- மாண்புமிகு கழகப் பொதுச்செயலாளர் புரட்சித் தமிழர் @EPSTamilNadu அவர்களின் முக்கிய அறிவிப்பு pic.twitter.com/mqappC34a2— AIADMK (@AIADMKOfficial) September 10, 2026
தற்போது அதிமுக எம்எல்ஏ எண்ணிக்கை 41 ஆக உள்ள நிலையில், இழந்த தொகுதிகளை மீண்டும் கைப்பற்றும் முனைப்பில் அதிமுக உள்ளது. இருப்பினும் இடைத்தேர்தலில் பெரும்பாலும் ஆளும் கட்சிகளே சமீப காலமாக தமிழ்நாட்டில் வெற்றி பெற்று வருகிறார்கள்.
மேலும் மும்முனை போட்டி என்பதால் ஆளும் கட்சி வெல்லவே அதிக வாய்ப்புள்ளதாகவும் அரசியல் நோக்கர்கள் கூறுகிறார்கள். தேர்தலில் நிலவிய 'விஜய்யின் விசில் அலை' இன்று குறையவில்லை என்பதால் இந்த 2 தொகுதியும் தவெக வசம் வர வாய்ப்புள்ளது என்றும் சமூக வலைதளங்களில் பேசப்படுகிறது.