Tamil Nadu Govt Scheme: அரசு மருத்துவமனைகளில் புற்றுநோய்க்காகச் சிகிச்சை பெற்று வரும் ஏழை, எளிய நோயாளிகளின் உடல்நலனைக் காக்கும் வகையில், தமிழக அரசு ஒரு நெகிழ்ச்சியான மற்றும் மனிதாபிமானமிக்கத் திட்டத்தைச் செயல்படுத்த உள்ளது. கடந்த 19.08.2026 அன்று தமிழக சட்டப்பேரவையில் விதி எண் 110-ன் கீழ் முதலமைச்சர் வெளியிட்ட "நோயாளிகளுக்கு ஊட்டச்சத்து ஆதரவு ரூ.2 கோடியே 77 லட்சம் ரூபாய் அளிக்கப்படும்" என்ற அறிவிப்பைச் செயல்படுத்தும் விதமாக, 'ஊட்டச்சத்து ஆதரவுத் திட்டம்' அதிகாரப்பூர்வமாகத் தொடங்கப்பட்டுள்ளது.
புற்றுநோய்க்கான அறுவை சிகிச்சை, கீமோதெரபி மற்றும் ரேடியோதெரபி ஆகிய தீவிர சிகிச்சைகளை மேற்கொள்ளும் நோயாளிகளுக்கு உடல் ரீதியாகக் கடுமையான ஊட்டச்சத்து குறைபாடு ஏற்படுவது வழக்கம். போதிய சத்துக்கள் இல்லாததால் நோயாளிகளின் உடல் வலிமை குறைந்து, அவர்கள் எடுத்துக்கொள்ளும் சிகிச்சைகள் முழுமையாகப் பலனளிக்காமல் போகும் அபாயம் உள்ளது. இதனைத் தடுத்து, நோயாளிகள் விரைவாகக் குணமடைவதை உறுதி செய்யவே தமிழக சுகாதாரத் துறை மற்றும் தேசிய நலவாழ்வு குழுமம் இணைந்து இத்திட்டத்தைக் கொண்டு வந்துள்ளன.
இத்திட்டத்தின் கீழ், அரசு மருத்துவமனைகளில் உள்நோயாளிகளாகத் தங்கிப் புற்றுநோய் சிகிச்சை பெறுபவர்களுக்குத் தினமும் 150 கிராம் அளவில் புரோட்டீன் மற்றும் நுண்ணூட்டச்சத்துக்கள் (Micronutrients) நிறைந்த சிறப்பு ஊட்டச்சத்து பவுடர் வழங்கப்பட உள்ளது. ஒரு பாக்கெட் ரூ.700 மதிப்புடையது. மருத்துவமனையில் சுமார் 45 நாட்கள் தங்கிச் சிகிச்சை பெறும் ஒரு நோயாளிக்கு, மொத்தம் 6 பாக்கெட்டுகள் வீதம் ரூ.4,200 மதிப்பிலான ஊட்டச்சத்து பவுடர் முற்றிலும் இலவசமாக வழங்கப்படும்.
கடந்த ஆண்டில் மட்டும் தமிழக அரசு மருத்துவமனைகளில் சுமார் 30,000 புற்றுநோயாளிகள் சிகிச்சை பெற்றுள்ளனர். இவர்களில் சுமார் 60 சதவீதம் பேருக்கு ஊட்டச்சத்து குறைபாடு ஏற்படும் அபாயம் இருப்பதாகக் கணக்கிடப்பட்டுள்ளது. அதன்படி, முதற்கட்டமாக 2027 ஜனவரி முதல் மார்ச் வரையிலான மூன்று மாத காலத்திற்கு 6,600 நோயாளிகள் பயன்பெறும் வகையில் மொத்தம் ரூ.2,77,20,000 (ரூ.2.77 கோடி) நிதி ஒதுக்கீடு செய்யப்பட்டுள்ளது. இந்தத் திட்டத்திற்கான நிதி மத்திய மற்றும் மாநில அரசுகளின் 60:40 என்ற பங்களிப்புடன் செயல்படுத்தப்படுகிறது.
தமிழகம் முழுவதும் புற்றுநோய் சிகிச்சை அளிக்கப்பட்டு வரும் பின்வரும் 18 முக்கிய அரசு மருத்துவமனைகள் மற்றும் மருத்துவக் கல்லூரி மருத்துவமனைகளில் இத்திட்டம் நடைமுறைப்படுத்தப்பட உள்ளது:
காஞ்சிபுரம் அறிஞர் அண்ணா நினைவு புற்றுநோய் மருத்துவமனை
சென்னை ராயப்பேட்டை அரசு மருத்துவமனை
சென்னை ராஜீவ் காந்தி அரசு பொது மருத்துவமனை
சென்னை ஸ்டான்லி அரசு மருத்துவக் கல்லூரி மருத்துவமனை
சென்னை ஓமந்தூரார் அரசு பன்னோக்கு உயர் சிறப்பு மருத்துவமனை
சென்னை கிண்டி கலைஞர் நூற்றாண்டு உயர் சிறப்பு மருத்துவமனை
சென்னை எழும்பூர் அரசு மகப்பேறு மற்றும் மகளிர் நல மருத்துவமனை
தஞ்சாவூர் அரசு மருத்துவக் கல்லூரி மருத்துவமனை
கோயம்புத்தூர் அரசு மருத்துவக் கல்லூரி மருத்துவமனை
மதுரை அரசு ராஜாஜி மருத்துவமனை
திருநெல்வேலி அரசு மருத்துவக் கல்லூரி மருத்துவமனை
சேலம் அரசு மருத்துவக் கல்லூரி மருத்துவமனை
திருவண்ணாமலை அரசு மருத்துவக் கல்லூரி மருத்துவமனை
தர்மபுரி அரசு மருத்துவக் கல்லூரி மருத்துவமனை
புதுக்கோட்டை அரசு மருத்துவக் கல்லூரி மருத்துவமனை
கன்னியாகுமரி அரசு மருத்துவக் கல்லூரி மருத்துவமனை
தூத்துக்குடி அரசு மருத்துவக் கல்லூரி மருத்துவமனை
விழுப்புரம் அரசு மருத்துவக் கல்லூரி மருத்துவமனை
நோயாளிகளுக்கு வழங்கப்படும் ஊட்டச்சத்து பவுடரின் தரம் மற்றும் சுவையில் எவ்வித சமரசமும் இருக்கக் கூடாது என்பதற்காக, தேசிய நலவாழ்வு குழும இயக்குநர் தலைமையில் 'மாநில அளவிலான நிபுணர் குழு' அமைக்கப்பட உள்ளது. இக்குழுவில் புற்றுநோய் சிகிச்சை நிபுணர்கள் மற்றும் ஊட்டச்சத்து நிபுணர்கள் இடம்பெறுவார்கள். நோயாளிகளின் உடல்நிலைக்கு ஏற்ப பவுடரில் இடம்பெற வேண்டிய சத்துக்கள், அதன் தரம் மற்றும் சுவை ஆகியவற்றை இக்குழுவே இறுதி செய்யும். இதனைத் தொடர்ந்து, தமிழ்நாடு மருத்துவப் பணிகள் கழகம் மூலம் வெளிப்படையான டெண்டர் விடப்பட்டு, தரமான ஊட்டச்சத்து பவுடர்கள் கொள்முதல் செய்யப்பட்டு மருத்துவமனைகளுக்கு விநியோகிக்கப்படும். தமிழக அரசின் இந்த நடவடிக்கை புற்றுநோயாளிகள் மற்றும் அவர்களின் குடும்பத்தினர் மத்தியில் பெரும் வரவேற்பைப் பெற்றுள்ளது.