ரேஷன் பொருட்கள் கடத்தல்! முதலமைச்சர் விஜய் போட்ட அதிரடி உத்தரவு

Tamil Nadu ration news : பொதுமக்களுக்கு அத்தியாவசியப் பொருட்கள் தடையின்றியும் நியாயமான விலையிலும் கிடைப்பதை உறுதி செய்யும் வகையில், தமிழ்நாடு அரசு மிக முக்கியமான கட்டுப்பாட்டு ஆணைகளைப் பிறப்பித்துள்ளது. 1955-ஆம் ஆண்டு அத்தியாவசியப் பொருட்கள் சட்டத்தின் பிரிவு 3-ன் கீழ், துவரம் பருப்பு, உளுத்தம் பருப்பு, அரிசி, நெல் மற்றும் சர்க்கரை ஆகியவற்றிற்கு இருப்பு வரம்புகளை நிர்ணயித்து அரசிதழில் வெளியிடப்பட்டுள்ளது. மேலும், வணிகர்கள் தங்களது இருப்பு விவரங்களைத் தொடர்ந்து அறிவிக்க வேண்டும் எனவும் அரசு வலியுறுத்தியுள்ளது.  

மேலும் படிக்க | ரூ.1.57 லட்சம் மானியத்தில் நாட்டுக்கோழிப் பண்ணை: எப்படி விண்ணப்பிப்பது?

நடைமுறை காலம் மற்றும் நோக்கம்

இந்திய அரசின் முன் இசைவுடன், அரசிதழ் எண்கள் 486, 487 மற்றும் சர்க்கரைக்கான மறுபதிப்பு அரசிதழ் எண் 490 ஆகியவை வெளியிடப்பட்டுள்ளன. அதன்படி, 13.11.2026-ஆம் தேதி முதல் மூன்று மாதங்களுக்குத் துவரம் பருப்பு மற்றும் உளுத்தம் பருப்பிற்கும், 31.01.2027 வரை அரிசி மற்றும் நெல்லுக்கும் இந்த இருப்பு வரம்புகள் நடைமுறையில் இருக்கும். மாநிலத்தில் அத்தியாவசியப் பொருட்களின் விலையேற்றத்தைக் கட்டுப்படுத்தவும், பொது விநியோகத் திட்டத்தின் கீழ் நியாய விலைக் கடைகள் மூலம் அரிசி மற்றும் பிற பொருட்கள் தடையின்றி விநியோகிக்கப்படுவதை உறுதி செய்யவும் இந்த அதிரடி நடவடிக்கை எடுக்கப்பட்டுள்ளது.  

வணிகர்களுக்கான இருப்பு வரம்பு விவரங்கள்
அரசு நிர்ணயித்துள்ள இந்த வரம்புகளுக்கு மேல் எந்தவொரு தனிநபரோ அல்லது நிறுவனமோ பொருட்களை இருப்பு வைத்திருக்கக் கூடாது என எச்சரிக்கப்பட்டுள்ளது.  

மொத்த வணிகர்கள்: துவரம் பருப்பு மற்றும் உளுத்தம் பருப்பு ஆகியவற்றை தலா 200 மெட்ரிக் டன் வரையும், அரிசி மற்றும் நெல்லை 2,000 மெட்ரிக் டன் வரையும் மட்டுமே இருப்பு வைக்க அனுமதிக்கப்பட்டுள்ளது.  

சில்லறை வணிகர்கள்: துவரம் பருப்பு மற்றும் உளுத்தம் பருப்பை தலா 5 மெட்ரிக் டன் வரையும், அரிசி மற்றும் நெல்லை 8 மெட்ரிக் டன் வரையும் இருப்பு வைத்துக்கொள்ளலாம்.  

சர்க்கரை வரம்பு: தமிழ்நாட்டைப் பொறுத்தவரை, வணிகர்களுக்கு சர்க்கரை இருப்பு வரம்பு 1,000 குவிண்டாலாக (15.10.2026 முதல்) நிர்ணயிக்கப்பட்டுள்ளது.  

பெரிய நிறுவனங்கள் மற்றும் ஆலை உரிமையாளர்களுக்கான விதிகள்

பெரிய தொடர் சில்லறை விற்பனை நிறுவனங்கள்: இவை தங்களது ஒவ்வொரு விற்பனை நிலையத்திலும் துவரம் பருப்பு மற்றும் உளுத்தம் பருப்பை தலா 5 மெட்ரிக் டன் வரையும், ஒவ்வொரு கிடங்கிலும் 200 மெட்ரிக் டன் வரையும் இருப்பு வைக்கலாம். அரிசி மற்றும் நெல்லைப் பொறுத்தவரை ஒவ்வொரு விற்பனை நிலையத்திலும் 8 மெட்ரிக் டன் வரை இருப்பு வைக்க அனுமதியளிக்கப்பட்டுள்ளது.  

ஆலை உரிமையாளர்கள் மற்றும் பதனிடுவோர்: துவரம் பருப்பு மற்றும் உளுத்தம் பருப்பு ஆலை உரிமையாளர்கள், கடந்த 3 மாதங்களின் சராசரி பதனிடும் அளவு அல்லது ஆண்டுத் திறனில் 25 சதவீதம் (இவற்றில் எது அதிகமோ அது) வரை இருப்பு வைத்துக்கொள்ளலாம். அரிசி மற்றும் நெல் ஆலை உரிமையாளர்கள் ஒரு மாத கால உற்பத்தி அளவுக்குள் இருப்பு வைத்திருக்க வேண்டும்.  

இறக்குமதியாளர்கள் மற்றும் செயல்பாட்டாளர்கள்: இறக்குமதியாளர்கள் தாங்கள் இறக்குமதி செய்த சரக்கு வந்து சேர்ந்த நாளிலிருந்து 45 நாட்களுக்கு மேல் பருப்பு வகைகள், அரிசி மற்றும் நெல்லை இருப்பு வைத்திருக்கக் கூடாது. மேலும், அரிசி மற்றும் நெல் செயல்பாட்டாளர்கள் (Operators) தங்களது மாதாந்திர இருப்பில் 60 சதவீதம் வரை மட்டுமே வைத்திருக்க அனுமதிக்கப்பட்டுள்ளனர்.  

பதுக்கலைத் தடுக்க சிறப்புக் குழு மற்றும் புகார் எண்கள்

சில வியாபாரிகள் அத்தியாவசியப் பொருட்களைப் பதுக்கி வைத்து செயற்கையான தட்டுப்பாட்டை உருவாக்கி விலையை ஏற்றுவதைத் தடுக்க, தமிழக அரசு சார்பில் சிறப்பு கண்காணிப்புக் குழு அமைக்கப்பட்டுள்ளது. எங்காவது நிர்ணயிக்கப்பட்ட வரம்பிற்கு மேல் பொருட்கள் பதுக்கி வைக்கப்பட்டிருந்தாலோ அல்லது அதிக விலைக்கு விற்பனை செய்யப்பட்டாலோ பொதுமக்கள் உடனடியாகப் புகார் அளிக்கலாம். இதற்காக 1967 மற்றும் 1800 425 5901 ஆகிய கட்டணமில்லாத் தொலைபேசி எண்கள் அறிவிக்கப்பட்டுள்ளன. இந்த நடவடிக்கைகளின் மூலம் சந்தையில் பொருட்கள் தாராளமாகக் கிடைப்பதுடன், விலைவாசி கட்டுக்குள் இருந்து சாதாரண மக்களுக்குப் பெரிய அளவில் பலன் கிடைக்கும் என எதிர்பார்க்கப்படுகிறது.