திருச்சி : ஆன்மீக பயணம் மேற்கொண்டால் ரூ.5000 மானியம்! முழு விவரம்

Trichy : மகாராஷ்டிர மாநிலம் நாக்பூரில் உள்ள வரலாற்றுச் சிறப்புமிக்க தீக்ஷா பூமியில் ஆண்டுதோறும் விஜயதசமி திருநாளில் 'தம்ம சக்கர பரிவர்தன' திருவிழா வெகு விமரிசையாகக் கொண்டாடப்பட்டு வருகிறது. பௌத்த மதத்தினருக்கு முக்கியத்துவம் வாய்ந்த இந்த ஆன்மிகத் திருவிழாவில், தமிழ்நாட்டிலிருந்து திரளான பௌத்தர்கள் கலந்து கொண்டு வருகின்றனர். இவ்வாறு புனிதப் பயணம் மேற்கொள்ளும் தமிழ்நாட்டைச் சேர்ந்த பௌத்த மதத்தைச் சார்ந்த மக்களுக்கு நிதி உதவி வழங்கி ஊக்குவிக்கும் நோக்கில், தமிழ்நாடு அரசால் சிறப்பு மானியத் திட்டம் செயல்படுத்தப்பட்டு வருகிறது.

இத்திட்டத்தின் கீழ், 2026 ஆம் ஆண்டு நாக்பூர் தீக்ஷா பூமிக்கு பயணம் மேற்கொண்டு தம்ம சக்கர பரிவர்தன திருவிழாவில் கலந்துகொண்டு திரும்பும் தமிழ்நாட்டைச் சேர்ந்த பௌத்தர்களுக்கு, நபர் ஒருவருக்கு அதிகபட்சமாக ரூ.5,000/- வரை மானியத் தொகையாக அரசு வழங்குகிறது. இந்தப் பொருளாதார உதவியைப் பெற்று பயன்பெற விரும்பும் தகுதியான பௌத்தர்களிடமிருந்து தற்போது அதிகாரப்பூர்வமாக விண்ணப்பங்கள் வரவேற்கப்படுவதாக திருச்சிராப்பள்ளி மாவட்ட ஆட்சித்தலைவர் திரு. பிரத்திக் தயாள், இ.ஆ.ப., அவர்கள் வெளியிட்டுள்ள விரிவான அறிக்கையில் தெரிவித்துள்ளார்.

இப்பயணத்திற்கான விண்ணப்பப் படிவங்களைப் பெறுவதற்கு மாவட்ட நிர்வாகம் மற்றும் சிறுபான்மையினர் நலத்துறை சார்பில் உரிய ஏற்பாடுகள் செய்யப்பட்டுள்ளன. விண்ணப்பதாரர்கள் திருச்சிராப்பள்ளி மாவட்ட ஆட்சியர் வளாகத்தில் செயல்பட்டு வரும் 'மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தை' நேரில் அணுகி, இந்த விண்ணப்பப் படிவங்களை எவ்விதக் கட்டணமுமின்றி இலவசமாகப் பெற்றுக் கொள்ளலாம். மேலும், நேரில் வர இயலாதவர்கள் தமிழ்நாடு அரசின் பிற்படுத்தப்பட்டோர், மிகவும் பிற்படுத்தப்பட்டோர் மற்றும் சிறுபான்மையினர் நலத்துறையின் அதிகாரப்பூர்வ இணையதளமான www.bcmbcmw.tn.gov.in என்ற முகவரியிலிருந்து விண்ணப்பப் படிவத்தைப் பதிவிறக்கம் செய்துகொள்ளும் வசதியும் ஏற்படுத்தப்பட்டுள்ளது.

விண்ணப்பதாரர்கள் படிவத்தில் கேட்கப்பட்டுள்ள அனைத்து விவரங்களையும் முழுமையாகவும் சரியாகவும் பூர்த்தி செய்ய வேண்டும். பூர்த்தி செய்யப்பட்ட விண்ணப்பத்துடன் தேவையான அனைத்து உரிய ஆவணங்களையும் இணைத்து, வரும் 15.11.2026-ஆம் தேதிக்குள் சென்னை சேப்பாக்கத்தில் உள்ள சிறுபான்மையினர் நலத்துறை அலுவலகத்திற்கு தபால் மூலமாகவோ அல்லது நேரிலோ சென்று சேரும் வகையில் அனுப்பி வைக்க வேண்டும்.

விண்ணப்பங்களை அனுப்ப வேண்டிய முகவரி: ஆணையர், சிறுபான்மையினர் நலத்துறை, கலசமஹால் பாரம்பரிய கட்டடம், முதல் தளம், சேப்பாக்கம், சென்னை – 600 005.

குறிப்பிட்ட கடைசி நாளான 15.11.2026-க்குள் தகுதியுடைய விண்ணப்பதாரர்கள் தங்களது விண்ணப்பங்களை அனுப்பி, தமிழ்நாடு அரசு வழங்கும் இந்த ரூ.5,000/- மானிய உதவித்தொகையைப் பெற்று பயனடையுமாறு திருச்சி மாவட்ட ஆட்சித்தலைவர் பிரத்திக் தயாள் கேட்டுக்கொண்டுள்ளார்.