இல்லத்தரசிகளுக்கு ஷாக் நியூஸ்! விலை உயரப் போகும் சமையல் எண்ணெய்

இந்தியாவில் தசரா மற்றும் தீபாவளி பண்டிகைகள் நெருங்கி வரும் நிலையில், முன்னணி சமையல் எண்ணெய் நிறுவனங்கள் அவற்றின் விலையை 7 முதல் 8 சதவீதம் வரை உயர்த்தப் பரிசீலித்து வருகின்றன. அதிகரித்துவரும் இறக்குமதி செலவுகளால் நிறுவனங்களின் லாப வரம்பு பாதிக்கப்பட்டுள்ளதே இந்த விலை ஏற்றத்திற்கான முக்கியக் காரணமாகத் தொழில்துறை வட்டாரங்கள் தெரிவிக்கின்றன.  

கடந்த மார்ச் மாதத்திற்குப் பிறகு மேற்கொள்ளப்படவுள்ள மூன்றாவது விலை உயர்வாக இது அமையும். முன்னதாக, மார்ச் மற்றும் ஜூன் மாதங்களுக்கு இடையில் இரண்டு கட்டங்களாகச் சமையல் எண்ணெய் நிறுவனங்கள் விலையை 5 முதல் 6 சதவீதம் வரை உயர்த்தியிருந்தன. இதன் மூலம் ஒட்டுமொத்தமாக 10 முதல் 12 சதவீதம் வரை ஏற்கெனவே விலை ஏற்றம் கண்டுள்ளது குறிப்பிடத்தக்கது.  

கச்சா சமையல் எண்ணெய்களின் இறக்குமதி செலவு அதிகரிப்பு, இந்திய ரூபாயின் மதிப்பு சரிவு, உயர்ந்த சரக்கு மற்றும் காப்பீட்டுச் கட்டணங்கள், மற்றும் உலகளாவிய சந்தையில் தாவர எண்ணெய்களின் விலை உயர்வு ஆகியவை எண்ணெய் சுத்திகரிப்பாளர்கள் மற்றும் பதப்படுத்துபவர்களுக்குக் கூடுதல் சுமையை ஏற்படுத்தியுள்ளன.  

இந்திய கரைப்பான் பிரித்தெடுப்போர் சங்கத்தின் தரவுகளின்படி, செப்டம்பர் 18 ஆம் தேதி நிலவரப்படி மும்பை துறைமுகங்களில் கச்சா பாமாயில், சோயாபீன் மற்றும் சூரியகாந்தி எண்ணெய் ஆகியவை முறையே ஒரு டன்னுக்கு $1,265, $1,314 மற்றும் $1,380 என்ற விலையில் இறக்குமதி செய்யப்பட்டுள்ளன. முந்தைய ஆண்டை ஒப்பிடுகையில் பாமாயில் மற்றும் சோயாபீன் எண்ணெய் விலைகள் 11 சதவீதமும், சூரியகாந்தி எண்ணெய் விலை 7 சதவீதமும் அதிகமாகும்.  

கச்சா சமையல் எண்ணெயின் இறக்குமதிச் செலவு சுமார் 8 முதல் 11 சதவீதம் வரை அதிகரித்துள்ளதால், வணிக நிறுவனங்களுக்கு இந்தச் சுமையை வாடிக்கையாளர்களிடம் மாற்றுவதைத் தவிர வேறு வழியில்லை என்று இமாமி குழுமத்தின் இயக்குனர் ஆதித்யா அகர்வால் தெரிவித்துள்ளார். எனினும், இந்த விலை உயர்வின் அளவும், அது எப்போது அமலுக்கு வரும் என்பதும் சந்தையில் உள்ள தேவை மற்றும் விநியோக நிலைமைகளைப் பொறுத்தே அமையும் என்றும் அவர் குறிப்பிட்டுள்ளார்.

இருப்பினும், கச்சா சமையல் எண்ணெய் ஏற்றி வரும் கப்பல்களின் வருகையால் சந்தையில் இருப்பின் அளவு மேம்பட்டு, விலை உயர்வு ஓரளவு கட்டுப்படுத்தப்படலாம் என எதிர்பார்க்கப்படுகிறது. மேலும், உள்நாட்டு விலை உயர்வைச் சமாளிக்க, தாவர எண்ணெய்கள் மீதான இறக்குமதி வரியைக் குறைக்க அரசாங்கம் பரிசீலித்து வருவதாகவும் தகவல்கள் தெரிவிக்கின்றன. இதற்கிடையில், மேற்கு ஆசியாவில் நிலவும் மோதல்கள் காரணமாக உலகளாவிய சமையல் எண்ணெய் விலை 15 சதவீதம் வரை அதிகரித்துள்ளதாக SEA-வின் நிர்வாக இயக்குனர் பி.வி. மேத்தா சுட்டிக்காட்டியுள்ளார்