tamil nadu kandu vatti law : பொதுமக்களைக் கந்துவட்டி மற்றும் அதிக வட்டி வசூலிக்கும் நபர்களின் பிடியிலிருந்து பாதுகாக்கும் நோக்கில் கொண்டுவரப்பட்ட ‘தமிழ்நாடு அதிக வட்டி வசூலிப்பு தடைச் சட்டம், 2003’ (Tamil Nadu Prohibition of Charging Exorbitant Interest Act, 2003 - Act No. 38 of 2003) நடைமுறையில் உள்ளது. இந்தச் சட்டத்தின் கீழ் அன்றாட வட்டி, மணி நேர வட்டி, கந்துவட்டி, மீட்டர் வட்டி மற்றும் தண்டல் போன்ற எந்த வடிவத்திலும் அரசு நிர்ணயித்த அளவை விடக் கூடுதல் வட்டி வசூலிப்பது முழுமையாகத் தடை செய்யப்பட்டுள்ளது.
கந்துவட்டி என்றால் என்ன? சட்டப்பூர்வ விளக்கம்:
தமிழ்நாடு அரசு வெளியிட்ட அரசிதழின்படி, ‘தமிழ்நாடு வட்டிக்கடைக்காரர்கள் சட்டம் 1957’ பிரிவு 7-ன் கீழ் அரசு நிர்ணயித்துள்ள வட்டி விகிதத்தை விட அதிகமான முறையில் வசூலிக்கப்படும் அனைத்து வட்டி வகைகளும் சட்டவிரோதமானவையாகக் கருதப்படுகின்றன.
மீட்டர் வட்டி: குறிப்பிட்ட காலக்கெடுவுக்குள் கடன் தொகையைத் திருப்பிச் செலுத்தாததற்காக நாளுக்கு நாள் உயர்த்தப்படும் அபராத வட்டி.
தண்டல்: அசல் தொகையின் ஒரு பகுதியுடன் சேர்த்து தினமும் அதிக வட்டி வசூலிக்கும் நடைமுறை.
தினசரி மற்றும் மணி நேர வட்டி: நாள் அல்லது மணி நேரக் கணக்கில் அரசு வரம்பை மீறி நிர்ணயிக்கப்படும் வட்டி விகிதங்கள் ஆகும்.
மிரட்டல் விடுத்தால் 3 ஆண்டுகள் சிறைத் தண்டனை:
இந்தச் சட்டத்தின் பிரிவு 3-ஐ மீறி யாரேனும் கூடுதல் வட்டி வசூலித்தாலோ, அல்லது கடன் பெற்றவரைப் பணம் வசூலிப்பதற்காகத் துன்புறுத்தினாலோ அல்லது அதற்கு உடந்தையாக இருந்தாலோ, அவர்களுக்கு 3 ஆண்டுகள் வரை சிறைத் தண்டனையும், ரூ.30,000 வரை அபராதமும் விதிக்க இந்தச் சட்டத்தின் பிரிவு 4 அதிகாரம் அளிக்கிறது.
நீதிமன்றம் வழியே அசல் கணக்கை முடிக்கும் வழிமுறை:
கடன் வாங்கிய நபர், அரசு நிர்ணயித்த நியாயமான வட்டியுடன் கூடிய கடன் தொகையை நேரடியாக நீதிமன்றத்தில் டெபாசிட் செய்து மனு தாக்கல் செய்யலாம். நீதிமன்றம் கடன் கொடுத்தவருக்கு 15 நாட்கள் அவகாசம் வழங்கி விசாரணை நடத்தி, கடன் முழுமையாகவோ அல்லது பகுதியாகவோ முடிந்துவிட்டதாக உத்தரவு பிறப்பிக்க முடியும். மேலும், இத்தகைய மனுக்களைத் தாக்கல் செய்வதற்கு நீதிமன்றக் கட்டணமாக வெறும் ரூ.100 மட்டுமே செலுத்தினால் போதுமானது.
கூடுதல் வட்டி பிடித்தம், சொத்துக்களை மீட்டல்:
அசலில் வட்டி கழிவு: கடன் பெற்றவர் அரசு விதித்த வரம்பிற்கு மேல் கூடுதல் வட்டி செலுத்தியிருந்தால், அந்தத் தொகையை அசல் தொகையிலிருந்து கழித்துச் சரிக்கட்ட நீதிமன்றம் உத்தரவிட முடியும்.
பறிமுதல் செய்யப்பட்ட சொத்துக்கள் மீட்பு: கடன் அல்லது வட்டி வசூலிப்பதற்காகக் கடன் வாங்கியவரிடமிருந்து அசையும் அல்லது அசையாச் சொத்துக்களைக் கட்டாயப்படுத்திப் பறித்திருந்தால், அந்தச் சொத்துக்களை உடனடியாக மீட்டுக் கடன் பெற்றவரிடமே ஒப்படைக்க நீதிமன்றம் உத்தரவிடும்.
தற்கொலைக்குத் தூண்டியதாகக் கடுமையான குற்றச்சாட்டு:
கடன் வாங்கியவரோ அல்லது அவரது குடும்பத்தினரோ (மனைவி/கணவர், திருமணமாகாத மகன் அல்லது மகள்) கடன் கொடுத்தவரின் துன்புறுத்தலால் தற்கொலை செய்து கொண்டால், அதற்கு கடன் கொடுத்தவரே அத்தற்கொலைக்குத் தூண்டியவராகக் கருதப்படுவார் எனச் சட்டத்தின் பிரிவு 9 திட்டவட்டமாகக் கூறுகிறது. இத்தகைய கடுமையான விதிகள் மூலம் பொதுமக்களைச் சுரண்டலில் இருந்து காக்க இச்சட்டம் வகைசெய்கிறது.
 "கந்துவட்டி, மீட்டர் வட்டிக்கு முற்றுப்புள்ளி! அதிக வட்டி கேட்டு மிரட்டினால் 3 ஆண்டு சிறை")
)