அணு ஆயுதக் கிடங்கை விரிவுபடுத்த புதிய நகரங்களை உருவாக்கும் சீனா: செயற்கைக்கோள் படங்களில் அம்பலம்

China's Nuke Power: போர் பதற்றங்கள் அதிகமாக உள்ள இன்றைய காலகட்டத்தில் உலக நாடுகள் தங்கள் பாதுகாப்பை வலுப்படுத்த அனைத்து விதமான முயற்சிகளையும் எடுத்து வருகின்றன. இதற்கு சீனாவும் விதிவிலக்கல்ல. சொலப்போனால், சீனா இந்த முயற்சிகளில் மற்ற நாடுகளை விட பன்மடங்கு துரிதமாக பணியாற்றி வருகின்றது.

அணு ஆயுத இருப்பை அதிகரிக்கும் சீனா

சீனா தனது அணு ஆயுத இருப்பை பெருமளவில் விரிவுபடுத்தி வருகிறது. சமீபத்திய மாதங்களில் குறைந்தது ஏழு அணுசக்தி சோதனை மற்றும் கட்டுமான மையங்களை சீனா புதிதாக அமைத்துள்ளது. செயற்கைக்கோள் படங்களின் பகுப்பாய்வின் அடிப்படையில் 'டெய்லி டெலிகிராப்' (Daily Telegraph) வெளியிட்டுள்ள அறிக்கை ஒன்று, சீனாவின் கிராமப்புறப் பகுதிகள் முழுவதும் மிகப்பெரிய உள்கட்டமைப்பு மற்றும் சோதனைத் தளங்களின் வலைப்பின்னல்கள் பரவியிருப்பதை வெளிப்படுத்துகிறது.

அணு ஆயுதங்களைக் குறைப்பதற்கு ஆதரவாக இருப்பதாக அதிபர் ஜி ஜின்பிங் பலமுறை கூறியிருந்தாலும், இந்தச் சமீபத்திய அறிக்கை முற்றிலும் மாறுபட்ட ஒரு சூழலையே காட்டுகிறது.

புதிதாக உருவான நகரம்

• சீனாவில் செயற்கைக்கோள்கள் படம் பிடித்த காட்சிகளை விவரிக்கும் அந்த அறிக்கை, ஒரு குறிப்பிட்ட இடத்தில் உள்ள அணுசக்தி மையத்தைச் சுற்றி ஒரு முழு நகரமே உருவானதாகக் குறிப்பிடுகிறது.
• அங்கு குடியிருப்புகள், ஊழியர்களுக்கான பேருந்து நிலையம் மற்றும் விளையாட்டு மைதானங்கள் ஆகியவை அமைக்கப்பட்டுள்ளன.
• மற்றொரு தளத்தில் 2,000 அடி நீளமுள்ள குழாய் ஒன்று உள்ளது. இதன் உள்ளே, அணு ஆயுதங்கள் மீதான தாக்குதலின் விளைவுகளைச் சீனா சோதிப்பதாகக் கூறப்படுகிறது.
• மூன்றாவதாக ஒரு தளத்தில், அதிநவீன லேசர்களைப் பயன்படுத்தி அணு வெடிப்பின் விளைவுகளை விஞ்ஞானிகள் ஆய்வு செய்து வருவதாகக் கருதப்படுகிறது.
• இந்த அணுசக்தி மையங்களுக்கான இடவசதியை உருவாக்க, சீனா பல கிராமங்களையும் விவசாயச் சமூகங்களையும் அழித்ததாகத் தெரிகிறது.

மேலும் படிக்க | வேலையை விட்டு தூக்கிய ஊழியர்களுக்கு..மீண்டும் வேலை கொடுக்கும் அமேசான்!

அணு ஆயுதங்கள் குறித்த சீனாவின் அதிகாரப்பூர்வ நிலைப்பாடு

அணு ஆயுதப் பரவல் தடுப்பு முயற்சிகளுக்கு ஜி ஜின்பிங் வெளிப்படையாக அழைப்பு விடுத்திருந்தாலும், அந்நாடு தொடர்ந்து அதிக அணு ஆயுதங்களைச் சோதித்து வருகிறது.

'விரிவான அணு ஆயுதச் சோதனைத் தடை ஒப்பந்தத்தில்' (Comprehensive Nuclear-Test-Ban Treaty) சீனா கையெழுத்திட்டுள்ளதுடன், "முதலில் அணு ஆயுதங்களைப் பயன்படுத்தாமை" (no first use) என்ற கொள்கையையும் கொண்டுள்ளது. இருப்பினும், 2012-ல் ஜி ஜின்பிங் பதவியேற்றதிலிருந்து சீனாவின் அணு ஆயுத இருப்பு தொடர்ந்து விரிவடைந்து வருகிறது.

சீனாவின் வளர்ந்து வரும் அணு ஆயுத இருப்பு

சீன அதிபர் ஜி ஜின்பிங் தலைமையின் கீழ், சீனாவின் அணு ஆயுத இருப்பு இருமடங்காக அதிகரித்துள்ளது. ஜனவரி 2025 நிலவரப்படி, அந்நாட்டின் கையிருப்பில் 620 அணு ஆயுத முனைகள் (warheads) இருந்தன. தற்போதைய வேகத்தில் சென்றால், 2035-க்குள் இந்த எண்ணிக்கை 1,500-ஐ எட்டும் என்று நிபுணர்கள் மதிப்பிடுவதாக 'டெலிகிராப்' அறிக்கை தெரிவிக்கிறது. அவற்றில் பல, சுமார் 15,000 கிலோமீட்டர் தொலைவு வரை சென்று தாக்கக்கூடிய திறன் கொண்டவை என்பது குறிப்பிடத்தக்கது.

அதேவேளையில், அமெரிக்கா மற்றும் ரஷ்யா ஆகிய நாடுகளே உலகின் மிகப்பெரிய அணு ஆயுத இருப்பைக் கொண்டுள்ளன. அமெரிக்காவிடம் சுமார் 5,300 அணு ஆயுத முனைகளும், ரஷ்யாவிடம் (மாஸ்கோ) சுமார் 5,500 அணு ஆயுத முனைகளும் உள்ளன.

இவை தவிர, நிலம், நீர்மூழ்கிக் கப்பல்கள் மற்றும் போர் விமானங்கள் ஆகியவற்றிலிருந்து ஏவக்கூடிய பல்வேறு வகையான அணு ஆயுதங்களைச் சீனா தன்வசம் கொண்டுள்ளது. அணு ஆயுதங்களை ஒழிப்பதற்கான சர்வதேச பிரச்சார அமைப்பின் (ICAN) தகவலின்படி, 2024-ஆம் ஆண்டில் அணு ஆயுதத் திட்டங்களுக்காக அந்த நாடு சுமார் 12.4 பில்லியன் டாலர்களைச் செலவிட்டுள்ளது.

மேலும் படிக்க | உக்ரைன் நாட்டின் உள்கட்டமைப்பை குறி வைத்து தாக்கிய ரஷ்யா: நிற்காமல் தொடரும் பதற்றம்

அமெரிக்காவில் ஜி ஜின்பிங்

இந்த நிலையில் உலக நாடுகளே உற்றுநோக்கும் முக்கிய நிகழ்வு அமெரிக்காவில் நடக்கவுள்ளது. ஜி ஜின்பிங் மூன்று நாள் பயணமாக அமெரிக்கா சென்றுள்ளார். அங்கு அவர் அமெரிக்க அதிபர் டொனால்ட் ட்ரம்ப்பைச் சந்திக்கவுள்ளார்.

"பிற நாடுகளின் அணு ஆயுதச் சோதனைத் திட்டங்கள் காரணமாக, நமது அணு ஆயுதங்களையும் அதே அளவிலான அடிப்படையில் சோதிக்கத் தொடங்க வேண்டும் என்று நான் பாதுகாப்புத் துறைக்கு (Department of War) உத்தரவிட்டுள்ளேன்," என்று அமெரிக்க அதிபர் கடந்த ஆண்டு 'ட்ரூத் சோஷியல்' (Truth Social) தளத்தில் பதிவிட்டிருந்தார். இந்த பதிவின் மூலம் அவர் சீனா, வட கொரியா போன்ற நாடுகளை பற்றி கூறியதாக நம்பப்படுகின்றது.

அமெரிக்க அதிபர் அந்நாட்டின் அணு ஆயுதக் கட்டமைப்பை விரிவுபடுத்த உத்தரவிட்டுள்ள நிலையில், இவ்விரு தலைவர்களும் அணு ஆயுதங்கள் தொடர்பான விவகாரத்தைப் பற்றி விவாதிப்பார்கள் என்று எதிர்பார்க்கப்படுகிறது.

மேலும் படிக்க | Explainer: அமெரிக்க அதிபர் டிரம்பின் விசித்திரமான நடவடிக்கைகள்.... எச்சரிக்கும் மனநல மருத்துவர்