American President Donald Trump: உலகில் உள்ள முக்கிய அரசியல் தலைவர்களில் அமெரிக்க அதிபருக்கு எப்போதும் ஒரு முக்கிய இடம் உள்ளது. அந்த பதவியில் யார் பொறுப்பேற்றாலும், அந்த நபர் உலகின் மிக முக்கியமான, சக்திவாய்ந்த நபராகிவிடுகிறார். அந்த வகையில் தற்போது அமெரிக்க அதிபராக இருக்கும் டொனால்ட் டிரம்ப் தினம் தினம் தலைப்புச் செய்திகளில் இடம்பெறும் ஒரு பிரபலமாக உள்ளார்.
டிரம்ப் ரசிகர்களுக்கு அதிர்ச்சி
அமெரிக்க அதிபராக இருப்பதால் மட்டுமல்லாமல், டொனால்ட் டிரம்பின் குணாதியங்களும் அவர் மீது மக்களுக்கு உள்ள ஆர்வத்தை குறைக்காமல் வைத்துள்ளன. எனினும், சமீபத்தில் கிடைத்துள்ள ஒரு செய்தி டிரம்ப் ரசிகர்களை அதிர்ச்சியில் ஆழ்த்தியுள்ளது.
மனநல மருத்துவரின் எச்சரிக்கை
அதிபர் டொனால்ட் டிரம்பின் மனநலம் குறித்து ஏற்கனவே கவலைகளை எழுப்பியிருந்த ஒரு மனநல மருத்துவர், ஒரு புதிய எச்சரிக்கையை விடுத்துள்ளார். டிரம்பின் சமீபத்திய சில நடத்தைகள், கையறுநிலை உணர்வுகளைக் கடந்து செல்வதற்கான தீவிரத் தேவையைப் பிரதிபலிக்கின்றன என்று அவர் விவரித்துள்ளார்.
கூற்றுகளை நிராகரித்த வெள்ளை மாளிகை
தடயவியல் மற்றும் சமூக மனநல மருத்துவருமான டாக்டர் பாண்டி லீ, முன்னர் ஹார்வர்ட் மற்றும் யேல் பல்கலைக்கழகங்களில் கற்பித்தவர். அவர் பல ஆண்டுகளாக டிரம்பின் உளவியல் ஆரோக்கியம் குறித்த கவலைகளைப் பகிரங்கமாக விவாதித்து வருகிறார். எனினும், வெள்ளை மாளிகை இத்தகைய கூற்றுக்களை 'அரசியல் நோக்கங்களுக்காக செய்யப்படும் பொய்யான ஊகங்கள்' என்று நிராகரித்துள்ளது.
டிரம்பைப் பதவியிலிருந்து நீக்கக் கோரி கடிதம்
லீ, 2017-ஆம் ஆண்டு வெளியான 'தி டேஞ்சரஸ் கேஸ் ஆஃப் டொனால்ட் டிரம்ப்' என்ற புத்தகத்தைத் தொகுத்தார். மேலும், இந்த ஆண்டின் தொடக்கத்தில், 25-வது அரசியலமைப்புத் திருத்தத்தின் கீழ் டிரம்பைப் பதவியிலிருந்து நீக்கக் கோரி 36 மருத்துவர்களுடன் இணைந்து ஒரு ஓப்பன் லெட்டரிலும் கையெழுத்திட்டார். அந்தக் கடிதம், அமெரிக்க அதிபருக்கு "அறிவாற்றல் செயல்பாட்டில் குறிப்பிடத்தக்க சரிவு" ஏற்பட்டுள்ளதாகக் குறிப்பிட்டது.
செப்டம்பர் 11 தாக்குதல்களின் போது நான் அங்கு இருந்தேன்: டிரம்ப்
வார இறுதியில் மெய்டாஸ்டச் (MeidasTouch) உடனான ஒரு நேர்காணலில், சமீபத்திய பல நிகழ்வுகள் தனது கவலைகளை அதிகரித்துள்ளதாக லீ கூறினார். அவற்றுள், செப்டம்பர் 11 தாக்குதல்களின் 25-வது ஆண்டு நிறைவை ஒட்டி டிரம்ப் தெரிவித்த கருத்துக்களையும் அவர் சுட்டிக்காட்டினார். இரட்டைக் கோபுரங்கள் இடிந்து விழுந்த சிறிது நேரத்திலேயே, தீயணைப்பு வீரர்கள் தன்னை கிரவுண்ட் ஜீரோவிலிருந்து தூக்கிச் சென்றதாக டிரம்ப் கூறியிருந்தார்!
அந்தக் கூற்றை ஆதரிக்கும் எந்த ஆதாரமும் கிடைக்கவில்லை என்று பல செய்தி நிறுவனங்கள் தெரிவித்தன. நியூயார்க் இதழ் அந்தக் கூற்றை ஒரு “விசித்திரமான பொய்” என்று விவரித்தது. பின்னர் ட்ரம்ப், ட்ரூத் சோஷியல் தளத்தில், “நான் சொன்ன அனைத்தும் முற்றிலும் துல்லியமானவை” என்று பதிலளித்தார். மேலும், “நான் அங்கே இருந்தேன், நிச்சயமாக அந்தச் சரிவு ஏற்பட்ட அதே நாளில் அல்ல, ஆனால் சிறிது நேரத்திற்குப் பிறகு” என்றும் அவர் கூறினார்.
முக்கிய வரலாற்று நிகழ்வுகளின் மையத்தில் தன்னை மீண்டும் மீண்டும் நிலைநிறுத்திக் கொள்ளும் ட்ரம்பின் போக்கிற்கு இந்தச் சம்பவம் ஒத்துப்போவதாக லீ வாதிட்டார்.
குழந்தைகள் இப்படித்தான் செய்வார்கள்....
டிரம்பின் சமீபத்திய மன நிலையை பற்றி மருத்துவர் பாண்டி லீ கூறியதாவது:
“தேசிய வரலாற்றில் ஒவ்வொரு குறிப்பிடத்தக்க நிகழ்விற்கும், தேசத்தில் உள்ள ஒவ்வொரு முக்கிய நினைவுச்சின்னத்திற்கும் அவரது பெயர் சூட்டப்பட வேண்டும் என்பதற்காக அவர் செய்யும் செயல்கள், இவை அனைத்தும் அவரது சுய உணர்வில் அவர் எவ்வளவு பலவீனமானவர் என்பதையே காட்டுகிறது. பொதுவாக குழந்தைகள் இப்படித்தான் செய்வார்கள்.”
“தாங்கள் மிகவும் உதவியற்றவர்கள் என்றும் மற்றவர்களின் கவனிப்பைச் சார்ந்திருப்பவர்கள் என்றும் உணரும் நிலையை எதிர்த்துப் போராடுவதற்காக, அவர்கள் பிரபஞ்சத்தின் ராஜாவாகவோ, ராணியாகவோ அல்லது ஆட்சியாளராகவோ இருப்பது போல் நினைத்துக்கொள்வார்கள். ஆனால் இப்படிப்பட்ட மனநிலை, இரண்டு அல்லது மூன்று வயதுக் குழந்தைக்கு இயல்பானது. எனினும், முழுமையாக வளர்ந்த ஒரு நபருக்கு இப்படிப்பட்ட எண்ணங்கள் இருப்பது அசாதாரணமானது, நோயியல் சார்ந்தது.”
அணு ஆயுதத்துக்கான கட்டளையைக் கூட கட்டுப்படுத்த முடியாது....
டிரம்ப் அணு ஆயுதங்களை ஏவத் தயாராவதைச் சித்தரிப்பது போல் தோன்றும் மீம்கள் உள்ளிட்ட, அவரது சமீபத்திய 'ட்ரூத் சோஷியல்' செயல்பாடுகள் குறித்தும் லீ கவலைகளை எழுப்பினார். "நாம் எதிர்கொள்ளும் மிகவும் ஆபத்தான சூழ்நிலை என்னவென்றால், நமது கட்டமைப்பு, அதாவது நம்மிடம் உள்ள அமைப்பு, ஒரு ஜனாதிபதி தகுதியானவராக இருந்தாலும் இல்லாவிட்டாலும், அவர் உணர்ச்சிவசப்பட்டு, ஒரு தூண்டுதலின் பேரில் செயல்பட்டாலும் இல்லாவிட்டாலும், அவரைக் கட்டுப்படுத்த நமக்கு எந்த வழியும் இல்லை," என்று அவர் கூறினார். "ஒரு அணு ஆயுதத்துக்கான கட்டளையைக் கட்டுப்படுத்த கூட வழி இல்லை." என்று அவர் தெரிவித்தார்.
தூக்கக் கலக்கம், கைகளில் ஏற்படும் காயங்கள்...
லீ, டிரம்ப்பை "நம்பமுடியாத அளவிற்கு மனரீதியாக நிலையற்ற ஒரு நபர்; அவருக்குக் கொடுக்கப்பட்ட அதிகாரம் அதிகரிக்க அதிகரிக்க, அவர் மீதான கட்டுப்பாடுகள் குறையக் குறைய, அவர் மேலும் நிலையற்றவராக மாறியுள்ளார்" என்று விவரித்தார்.
டிரம்பின் உடல் மற்றும் மனநலம் மீது பொதுமக்களின் கவனம் மீண்டும் திரும்பியுள்ள நிலையில் இந்த விவாதம் எழுந்துள்ளது. பகல் நேரங்களில் ஏற்படும் வெளிப்படையான தூக்கக் கலக்கம், கைகளில் ஏற்படும் காயங்கள் மற்றும் கணுக்கால்களைச் சுற்றியுள்ள வீக்கம் போன்ற நிகழ்வுகளை அறிக்கைகள் எடுத்துக்காட்டியுள்ளன.
கடுமையாக நிராகரித்த வெள்ளை மாளிகை
டிரம்ப் உடல்நலக்குறைவுடன் இருக்கிறார் அல்லது பதவிக்குத் தகுதியற்றவர் என்ற கருத்துகளை வெள்ளை மாளிகை கடுமையாக நிராகரித்துள்ளது. இப்படி குறை கூறும் அந்த மருத்துவர் கண்டிப்பாக ஜனநாயகக் கட்சியின் ஒரு திறமையற்ற மருத்துவராக இருப்பார் என வெள்ளை மாளிகை செய்தித் தொடர்பாளர் டேவிஸ் இங்கிள் 'தி இன்டிபென்டன்ட்' பத்திரிகையிடம் கூறினார்.
அமெரிக்க வரலாற்றிலேயே அதிக ஆற்றல்மிக்க அதிபர்: வெள்ளை மாளிகை
மருத்துவர் பாண்டி லீயின் கூற்றுகளை முற்றிலுமாக மருத்த வெள்ளை மாளிகை அதிபர் ரிரம்பின் புத்திசாலித்தனத்தை பாராட்டி பதிலளித்துள்ளது. வெள்ளை மாளிகை கூறியதாவது:
"அமெரிக்க வரலாற்றிலேயே அதிபர் டிரம்ப் மிகவும் கூர்மையான, எளிதில் அணுகக்கூடிய மற்றும் ஆற்றல்மிக்க அதிபர் ஆவார். மேலும், தங்கள் இருக்கையில் இருந்தபடியே அரசியல் நோக்கங்களுக்காகத் கதை கட்டுதல் அல்லது தவறான ஊகங்களில் ஈடுபடும் அனைத்து மருத்துவ நிபுணர்களும், தாங்கள் எடுத்த உறுதிமொழியைத் தெளிவாக மீறுவதாகவே அர்த்தம்."
டிரம்பின் கைகளில் மீண்டும் மீண்டும் ஏற்படும் காயங்களுக்கு அடிக்கடி கைகுலுக்குவதே காரணம் என்றும், அவரது கணுக்கால்களில் ஏற்பட்ட வீக்கத்திற்கு நாள்பட்ட க்ரோனிக் வென்யுவஸ் பற்றாக்குறையே காரணம் என்றும் வெள்ளை மாளிகை கூறியுள்ளது. இதற்கிடையில், டிரம்ப் தான் மிகச் சிறந்த ஆரோக்கியத்துடன் இருப்பதாக அவ்வபோது கூறி வருகிறார். மே மாதம் நடந்த மருத்துவப் பரிசோதனையைத் தொடர்ந்து, "எல்லா சோதனைகளின் முடிவுகளும் மிகச் சரியாக வந்துள்ளன" என்று அவர் கூறியிருந்தார்.
இதற்கிடையில், மருத்துவ மற்றும் தடயவியல் உளவியலாளரான டாக்டர் ஜான் கேரிசன் காலப்போக்கில் ட்ரம்பின் 'செங்குத்தான நரம்பியல் சரிவை' தன்னால் உணரமுடிவதாக கூறியுள்ளார். இந்த கருத்து முற்றிலும் பொது தோற்றத்தின் அடிப்படையிலானது என்றும் அவர் தெரிவித்துள்ளார்.
டிரம்ப் பேசும்போது சில சொற்களுக்கு ஒருமுறை தனது தாளலயத்தை இழப்பது போலவும், வாக்கியங்களை முழுமையாக்க முயலும்போது அவ்வப்போது பேச்சை நிறுத்தி மீண்டும் தொடங்குவது போலவும் தெரியும் ஒரு காணொளித் துணுக்கை அவர் சுட்டிக்காட்டினார். அந்தக் காணொளி மட்டும் நரம்பியல் ரீதியான காரணத்தை உறுதிப்படுத்தாவிட்டாலும், அத்தகைய இடைநிறுத்தங்களையும் தயக்கங்களையும் மொழியை வெளிப்படுத்துவதில் உள்ள சிரமத்தின் சாத்தியமான அறிகுறிகளாக கேரிசன் விளக்கினார்.
 "Explainer: அமெரிக்க அதிபர் டிரம்பின் விசித்திரமான நடவடிக்கைகள்.... எச்சரிக்கும் மனநல மருத்துவர்")
)