இந்தியாவின் நட்சத்திர வீரர் நீரஜ் யாதவ் மரணம்.. பாரா விளையாட்டு உலகை உலுக்கிய சோகம்

இந்திய பாரா விளையாட்டு உலகை அதிர்ச்சியில் ஆழ்த்தும் வகையில், மூன்று முறை ஆசியன் பாரா விளையாட்டுப் போட்டிகளில் தங்கப் பதக்கம் வென்ற முன்னணி வீரர் நீரஜ் யாதவ் உயிரிழந்துள்ளார். 42 வயதான அவர் தற்கொலை செய்து கொண்டதாக தகவல்கள் வெளியாகியுள்ள நிலையில், அவரது மரணத்திற்கான துல்லியமான காரணம் இதுவரை உறுதிப்படுத்தப்படவில்லை. பல சாதனைகளால் ரசிகர்களின் மரியாதையைப் பெற்ற ஒரு விளையாட்டு வீரரின் இழப்பு, இந்திய விளையாட்டுத் துறைக்கு மிகப்பெரிய அதிர்ச்சியாக பார்க்கப்படுகிறது.

தற்கொலை செய்துகொண்டதாக தகவல்

தகவல்களின்படி, வீல்சேர் தடகள வீரரான நீரஜ் யாதவ் செவ்வாய்க்கிழமை (அக்டோபர் 27) இரவு விஷம் அருந்தியதாக கூறப்படுகிறது. அவர் தங்கியிருந்த குடியிருப்பில் இந்த சம்பவம் நடந்ததாகத் தெரிவிக்கப்பட்டுள்ளது.

இந்தியாவின் தலைமை பாரா தடகள பயிற்சியாளர் எஸ். சத்யநாராயணா, இந்த சோகச் செய்தியை உறுதிப்படுத்தியுள்ளார். நீரஜ் விஷம் அருந்தியதாக தனக்கும் தகவல் கிடைத்துள்ளதாகவும், இது மிகவும் துயரமான மற்றும் கவலைக்குரிய நிகழ்வு என்றும் அவர் தெரிவித்துள்ளார்.

HEARTBREAKING NEWS: THREE-TIME ASIAN PARA GAMES GOLD MEDALLIST NEERAJ YADAV DIES AT 42 🇮🇳💔 The Indian Para-athlete reportedly died by suicide on Tuesday night, according to a report by The Times of India. The circumstances surrounding his death remain unclear. Neeraj won Gold in Men’s Javelin F55 at the 2018 Asian Para Games and two more Gold medals at the 2022 Asian Para Games. Our heartfelt condolences to his family, friends, and the sporting community during this difficult time. May his soul rest in peace. 🙏

— The Khel India (@TheKhelIndia) October 28, 2026

ஆசியன் பாரா விளையாட்டுப் போட்டியில் ஏமாற்றம்

சமீபத்தில் ஜப்பானில் நடைபெற்ற 2026 ஆசியன் பாரா விளையாட்டுப் போட்டிகளில் நீரஜ் யாதவ் இடம்பெறவில்லை. ஊக்கமருந்து தொடர்பான இடைக்கால தடை காரணமாக அவர் போட்டியில் கலந்து கொள்ள தகுதி பெற முடியாத நிலை ஏற்பட்டது.

இந்தப் போட்டியில் விளையாட வேண்டும் என்ற ஆவல் நீரஜுக்கு அதிகமாக இருந்திருக்கலாம் என்று பயிற்சியாளர் சத்யநாராயணா கூறியுள்ளார். 

ஆசியன் பாரா விளையாட்டுப் போட்டிகளில் பதக்கங்கள் வெல்வது அரசு நிதி ஊக்கத்தொகை மற்றும் நிலையான வேலை வாய்ப்புகளைப் பெறும் வாய்ப்பாகவும் அமைகிறது. ஆனால் தடைக் காலம் முடிவடையாத காரணத்தால் அவர் அந்த வாய்ப்பை இழந்தது மன உளைச்சலை ஏற்படுத்தியிருக்கலாம் என்ற கருத்தும் வெளியாகியுள்ளது.

மேலும் படிக்க - Explainer: 2017லேயே முடிய வேண்டிய கரியர்.. 8 ஆண்டுகளாக தாக்குபிடித்த ரோகித் சர்மா! என்ன நடந்தது?

நீரஜ் யாதவ் யார்?

உத்தரப்பிரதேசத்தைச் சேர்ந்த நீரஜ் யாதவ், ஏழு வயதில் ஏற்பட்ட உடல்நலப் பிரச்சினையால் பக்கவாதத்தால் பாதிக்கப்பட்டார். அதன்பிறகு சக்கர நாற்காலியையே வாழ்க்கையின் ஒரு பகுதியாக ஏற்றுக்கொண்ட அவர், விளையாட்டின் மூலம் தன்னுடைய திறமையை உலகுக்கு நிரூபித்தார்.

2015-ஆம் ஆண்டு டெல்லி மாநில தடகளப் போட்டியில் குண்டு எறிதல், ஈட்டி எறிதல் மற்றும் வட்டு எறிதல் ஆகிய மூன்று பிரிவுகளிலும் தங்கப் பதக்கம் வென்று முதல் முறையாக கவனத்தை ஈர்த்தார். இதுவே அவரது சர்வதேச விளையாட்டு பயணத்திற்கான அடித்தளமாக அமைந்தது.

ஆசியன் பாரா விளையாட்டுப் போட்டி: சாதனையுடன் தங்கம் வென்றார்

இந்தோனேசியாவின் ஜகார்த்தாவில் நடைபெற்ற ஆசியன் பாரா விளையாட்டுப் போட்டியில், ஆண்களுக்கான எப்55 ஈட்டி எறிதல் பிரிவில் 29.84 மீட்டர் தூரம் எறிந்து தங்கப் பதக்கம் வென்றார். அதோடு அந்தப் போட்டியில் புதிய ஆசிய சாதனையையும் படைத்தார்.

இந்த வெற்றி அவரது வாழ்க்கையில் திருப்புமுனையாக அமைந்தது. இந்தியாவின் சிறந்த பாரா தடகள வீரர்களில் ஒருவராக அவர் உயர்வதற்கான பாதை இதன் மூலம் உருவானது.

சர்வதேச வெற்றிகளை குவித்த நீரஜ் யாதவ்

2022-ஆம் ஆண்டு மொராக்கோவின் மராக்கெஷில் நடைபெற்ற பாரா தடகள கிராண்ட் பிரிக்ஸ் தொடரில், எப்55/56 வட்டு எறிதல் பிரிவில் தங்கப் பதக்கம் வென்று மீண்டும் தனது திறமையை நிரூபித்தார்.

அதனைத் தொடர்ந்து, 2023 ஹாங்சோ ஆசியன் பாரா விளையாட்டுப் போட்டிகளில் ஈட்டி எறிதல் மற்றும் வட்டு எறிதல் ஆகிய இரு பிரிவுகளிலும் தங்கப் பதக்கம் வென்று இந்தியாவுக்கு பெருமை சேர்த்தார். இதன் மூலம் மூன்று முறை ஆசியன் பாரா விளையாட்டுத் தங்கம் வென்ற வீரராக அவர் தனித்துவமான இடத்தைப் பெற்றார்.

ஊக்கமருந்து சர்ச்சையால் ஏற்பட்ட பின்னடைவு

சர்வதேச அளவில் தொடர்ந்து வெற்றிகளை குவித்துக் கொண்டிருந்த நிலையில், 2023-ஆம் ஆண்டு இறுதியில் அவரது விளையாட்டு வாழ்க்கையில் எதிர்பாராத பின்னடைவு ஏற்பட்டது.

போட்டிக்கு வெளியே எடுக்கப்பட்ட மாதிரியில் ஸ்டானோசோலோல் என்ற தடைசெய்யப்பட்ட மருந்து இருப்பது கண்டறியப்பட்டதாக கூறப்பட்டதை அடுத்து, தேசிய ஊக்கமருந்து தடுப்பு அமைப்பு (NADA) அவரை இடைக்காலமாக தடை செய்தது. இந்த நடவடிக்கை காரணமாக முக்கியமான சர்வதேச போட்டிகளில் பங்கேற்கும் வாய்ப்பை அவர் இழந்தார்.

இந்திய விளையாட்டு உலகின் ஈடு செய்ய முடியாத இழப்பு

உடல் சவால்களை மீறி சர்வதேச மேடையில் இந்தியக் கொடியை உயர்த்திய நீரஜ் யாதவ், பல மாற்றுத்திறனாளி விளையாட்டு வீரர்களுக்கு ஊக்கமாக திகழ்ந்தார். வாழ்க்கையில் பல தடைகளை எதிர்கொண்டு வெற்றியின் உச்சிக்குச் சென்ற அவரது பயணம், பலருக்கு உத்வேகமாக இருந்தது.

ஆனால் பல பதக்கங்களையும் சாதனைகளையும் தாண்டி ஒரு வீரரின் மனநலப் போராட்டங்கள் எவ்வளவு ஆழமாக இருக்க முடியும் என்பதை இந்த சம்பவம் மீண்டும் நினைவூட்டுகிறது. இந்திய பாரா விளையாட்டு வரலாற்றில் நீரஜ் யாதவின் சாதனைகள் என்றும் நினைவுகூரப்படும். அவரது மறைவு விளையாட்டு உலகிற்கு ஒரு பெரிய வெற்றிடத்தை ஏற்படுத்தியுள்ளது.

மேலும் படிக்க - ஹோட்டல் ஊழியரிடம் பாலியல் அத்துமீறல்... ஆசிய போட்டியில் இந்திய வீரர் வெளியேற்றம் - நடந்தது என்ன?