ஆந்திராவில் CM விஜய்... சந்திரபாபு சொன்ன வார்த்தை... சென்னைக்கு வருது கிருஷ்ணா நதிநீர்
CM Vijay Andhra Visit: ஆந்திராவுக்குச் சென்றுள்ள முதலமைச்சர் விஜய், சந்திரபாபு நாயுடு உடன் கிருஷ்ணா நதிநீர் பகிர்வு குறித்து ஆலோசனை மேற்கொண்டார். இதைத் தொடர்ந்து, சென்னைக்கு கிருஷ்ணா நதிநீர் திறக்கப்படும் என ஆந்திர அதிகாரிகள் தரப்பில் தகவல்கள் வெளியாகி உள்ளன.
CM Vijay Andhra Visit: தமிழ்நாடு முதலமைச்சர் விஜய் இன்று ஆந்திராவுக்குச் சுற்றுப்பயணம் மேற்கொண்டார். சென்னையில் இருந்து தனி விமானம் மூலம் கன்னாவரம் விமான நிலையம் சென்றடைந்த முதலமைச்சர் விஜய், விஜயவாடாவில் உள்ள ஸ்ரீகனகதுர்கை கோவிலுக்குச் சென்று வழிபாடு நடத்தினார்.
தொடர்ந்து கோதவரி - காவிரி நதிநீர் இணைப்பு குறித்து ஆந்திர முதலமைச்சர் சந்திரபாபு நாயுடு, துணை முதலமைச்சர் நாரா லோகேஷ் உள்ளிட்டோரை முதலைமைச்சர் விஜய் சந்தித்தார். ஆந்திர பயணத்தில் நீர்வளத்துறை அமைச்சர் என். ஆனந்த், பொதுப்பணித்துறை அமைச்சர் ஆதவ் அர்ஜுனா ஆகியோர் முதலமைச்சர் உடன் சென்றனர்.
ஒரே மேடையில் 2 முதல்வர்கள்
இந்நிலையில், விஜயவாடாவில் நவராத்திரியை முன்னிட்டு நடைபெற்ற விஜயவாடா உற்சவம் 2.0 நிகழ்ச்சியில் தமிழ்நாடு முதலமைச்சர் விஜய் சிறப்பு விருந்தினராக பங்கேற்றார். இந்த விழாவில் ஆந்திரா முதலமைச்சர் சந்திரபாபு நாயுடுவுடன் விஜய் ஒரே மேடையில் தோன்றினார்.
தெலுங்கில் உரையாற்றி CM விஜய்
விழா மேடையில் தெலுங்கில் வணக்கம் சொல்லி முதலமைச்சர் விஜய் பேசத் தொடங்கினார். தொடர்ந்து, தனக்கு அழைப்பு விடுத்ததற்கு சந்திரபாபு நாயுடுவுக்கு நன்றி சொன்ன முதலமைச்சர் விஜய், விஜய்வாடா தனக்கு அளித்த விருந்தோம்பலுக்கும் நன்றி தெரிவித்தார். இவை அனைத்தையும் அவர் தெலுங்கில் பேசியது குறிப்பிடத்தக்கது.
ஆந்திர முதலமைச்சர் சந்திரபாபு நாயுடுவுடன் நதிநீர் பகிர்வு குறித்து ஆலோசனை நடத்தியதாகவும் அவர் தெரிவித்தார். மேலும், 'என் நெஞ்சில் குடியிருக்கும்...' என்று தமிழில் கூறி விஜயவாடா மக்களுக்கு தனது வணக்கத்தையும், நன்றியையும் தெரிவித்தார்.
மேலும் படிக்க | மெட்ரோ ரயில் பயணத்தின் போது..பிரதமர் மோடி பேசியது என்ன? வெளியான தகவல்!
முன்னதாக மேடையில் பேசிய முதலமைச்சர் சந்திரபாபு நாயுடு, "நீர் பற்றாக்குறை இருந்தாலும் தமிழ்நாட்டிற்கு தேவையான தண்ணீரை வழங்குவோம். நடப்பாண்டில் சென்னைக்கு இதுவரை 4.08 டிஎம்சி நீர் வழங்கப்பட்டுள்ளது. நீர் விவகாரத்தில் Conflict வேண்டாம்; Cooperation மட்டுமே தேவை என கிருஷ்ணா நதிநீர் விவகாரத்தில் ஆந்திர முதலமைச்சர் சந்திரபாபு நாயுடு உறுதியளித்தார்.
சென்னைக்கு 3 டிஎம்சி கிருஷ்ணா நீர்
தற்போது முதலமைச்சர் விஜய் ஆந்திராவுக்குச் சுற்றுப்பயணம் மேற்கொண்டிருக்கும் இந்த வேளையில், கிருஷ்ணா நதிநீரில் சென்னைக்கு அடுத்த இரண்டு மாதங்களில் 3 டிஎம்சி நீரை வழங்குவதற்கு ஆந்திர அரசு முடிவு எடுத்திருப்பதாக தகவல்கள் வெளியாகி உள்ளன.
ஆந்திர முதலமைச்சர் சந்திரபாபு நாயுடு, தமிழ்நாடு முதலமைச்சர் விஜய் ஆகியோரின் பேச்சுவார்த்தையில் இந்த முடிவு எட்டப்பட்டதாகவும், அதிகாரப்பூர்வ அறிவிப்பு விரைவில் வெளியாகும் என அதிகாரிகள் தரப்பில் தகவல்கள் வெளியாகி உள்ளன.
