தமிழ்நாடு கட்டிட விதிகளில் மாற்றம்: உயரக் கட்டுப்பாட்டு விதிமுறைகளைத் தளர்த்திய தமிழக அரசு

சென்னை: வீடு கட்ட அல்லது வாங்க திட்டமிட்டுள்ளீர்களா? அப்படியென்றால் உங்களுக்கு ஒரு முக்கிய செய்தி உள்ளது. வீட்டுவசதி மற்றும் நகர்ப்புற வளர்ச்சித் துறை, திங்கள்கிழமை அன்று 'தமிழ்நாடு ஒருங்கிணைந்த வளர்ச்சி மற்றும் கட்டிட விதிகள், 2019'-ல் திருத்தங்களைச் செய்துள்ளது. இதன்படி, உயரமான கட்டிடங்கள் அல்லாத பிற கட்டிடங்களுக்கான (Non High-Rise Buildings - NHRB) உயர வரம்பு 18.3 மீட்டரிலிருந்து 19.5 மீட்டராக உயர்த்தப்பட்டுள்ளது.

கட்டிடங்களின் உயர வரம்பில் மாற்றம்

முன்பு, 18.3 மீட்டருக்கு மேல் உயரம் கொண்ட கட்டிடங்கள் 'உயரமான கட்டிடங்கள்' என வகைப்படுத்தப்பட்டன. இத்தகைய கட்டிடங்களுக்கு, உயரமானவை அல்லாத கட்டிடங்களுடன் ஒப்பிடுகையில், கட்டுமானத்திற்கான கடுமையான விதிமுறைகள் பின்பற்றப்பட வேண்டியிருந்தது.

உயரமானவை அல்லாத கட்டிடங்களுக்கான 18.3 மீட்டர் உயர வரம்பால், அத்தகைய பிரிவில் வரும் குடியிருப்பு கட்டிடங்களுக்கு 'கட்டுமான நிறைவுச் சான்றிதழ்' (completion certificate) பெறுவதில் பல கட்டுமான நிறுவனங்கள் சிக்கல்களைச் சந்தித்து வந்தன. இந்த புதிய திருத்தத்தின் மூலம், கட்டிடங்களின் மேற்கூரை உயரம் அதிகரிப்பதோடு, குடியிருப்புகளில் காற்றோட்டமும் அழகியலும் மேம்படும்.

இந்தத் திருத்தத்தின்படி, சென்னை பெருநகரப் பகுதியில் (Chennai Metropolitan Area), 12 மீட்டர் அல்லது அதற்கு மேற்பட்ட அகலம் கொண்ட சாலைகளை ஒட்டியுள்ள மற்றும் அந்தச் சாலைகள் வழியாக அணுகக்கூடிய இடங்கள், வணிகப் பயன்பாட்டு மண்டலங்களாகக் கருதப்படும். தமிழ்நாட்டின் பிற பகுதிகளில், 9 மீட்டர் அல்லது அதற்கு மேற்பட்ட அகலம் கொண்ட சாலைகளை ஒட்டியுள்ள மற்றும் அந்தச் சாலைகள் வழியாக அணுகக்கூடிய இடங்கள் வணிகப் பயன்பாட்டு மண்டலங்களாகக் கருதப்படும்.

இந்தத் திருத்தங்கள், வணிகப் பயன்பாட்டிற்கான சாலை அகல அளவுகோல்கள், வாகன நிறுத்துமிடம், குடியிருப்பு வசதிகள், மின் வாகன (EV) சார்ஜிங் வசதிகள் மற்றும் அணுகல்தன்மை தொடர்பான விதிகளையும் மாற்றியமைக்கின்றன. மேலும், நிலத்தடி நீர் மறுஊட்டப் பகுதிகளில் (Aquifer recharge areas) அமைந்துள்ள கட்டுப்படுத்தப்பட்ட வளர்ச்சி மண்டலங்களுக்கான கட்டிட விதிகளும் திருத்தப்பட்டுள்ளன. இதில், பல்வேறு நில வகைகளுக்குத் தேவையான குறைந்தபட்ச மனையின் அளவு மற்றும் தளப்பரப்பு குறியீடு (Floor Space Index - FSI) வரம்புகள் குறிப்பிடப்பட்டுள்ளன.

மேலும் படிக்க | Tamil News LIVE: தேனி சிறையில் இருந்து 17 கைதிகள் தப்பியோட்டம்.. அன்பில் மகேஷ் நவ.6 வரை நீதிமன்ற காவல்!

மனை பரப்பளவு அளவுகள்

'நத்தம்' (Natham) பகுதிகள் மற்றும் பொருளாதார ரீதியாக நலிந்த பிரிவினருக்கான பகுதிகளில் உள்ள மனைகள் குறைந்தபட்சம் 80 சதுர மீட்டர் பரப்பளவு கொண்டிருக்க வேண்டும். இவற்றிற்கான FSI வரம்பு 1 ஆக நிர்ணயிக்கப்பட்டுள்ளது. பிற பகுதிகளில், குறைந்தபட்ச மனையின் அளவு 220 சதுர மீட்டராகவும், FSI வரம்பு 0.8 ஆகவும் இருக்கும்.

அலுவலகங்களில் வாகன நிறுத்துமிடங்கள்

தகவல் தொழில்நுட்ப (IT) அலுவலகங்கள், தகவல் தொழில்நுட்பம் சார்ந்த சேவைகள் மற்றும் உயிர் தகவலியல் (Bioinformatics) மையங்களுக்கான வாகன நிறுத்துமிட விதிகள் குறித்தும் இந்தத் திருத்தங்கள் புதிய வழிமுறைகளை அறிமுகப்படுத்துகின்றன. இத்தகைய நிறுவனங்கள், ஒவ்வொரு 75 சதுர மீட்டர் தளப்பரப்பிற்கும் ஒரு கார் நிறுத்துமிடத்தையும், ஒவ்வொரு 50 சதுர மீட்டர் தளப்பரப்பிற்கும் ஒரு இருசக்கர வாகன நிறுத்துமிடத்தையும் வழங்க வேண்டும்.

உயரமான கட்டிடங்களைப் (High-Rise Buildings - HRB) பொறுத்தவரை, அனுமதிக்கப்பட்ட FSI (இது மனையின் அளவிற்கு ஏற்ப எவ்வளவு தளப்பரப்பைக் கட்டலாம் என்பதைத் தீர்மானிக்கிறது) மாறாமல் உள்ளது. இதன் அளவுகள் பின்வருன்மாறு:

• 12 மீட்டர் அகலமுள்ள சாலைகளுக்கு 2, 
• 15 மீட்டர் சாலைகளுக்கு 2.5 மற்றும் 
• 18 மீட்டர் சாலைகளுக்கு 3.25

மேலும் படிக்க | Aavin: ஆவின் நெய், வெண்ணெய், இனிப்பு வகைகள் விலை அதிரடி உயர்வு.. புதிய விலை பட்டியல் இங்கே!

கட்டிடங்களுக்கு இடையிலான இடைவெளி

கட்டிடத்தின் உயரத்திற்கு ஏற்ப, கட்டிடத்தைச் சுற்றியுள்ள இடைவெளி அதிகரிக்க வேண்டும். 30 மீட்டர் உயரம் வரையிலான கட்டிடங்களுக்கு 7 மீட்டர் இடைவெளியும், 87 மீட்டருக்கு மேல் உயரமுள்ள கட்டிடங்களுக்கு 16 மீட்டர் இடைவெளியும் தேவைப்படும்.

விடுதிகள் மற்றும் தங்கும் லாட்ஜுகள் (Hotels and lodges), ஓட்டுநர்களுக்காக தங்குமிட வசதியை (Dormitory) ஏற்படுத்த வேண்டும். இதில், தேவைப்படும் ஒவ்வொரு கார் நிறுத்துமிடத்திற்கும் ஒரு படுக்கை வீதம் ஒதுக்கப்பட வேண்டும்.

பெரும்பாலான புதிய குடியிருப்பு கட்டிடங்களில், கார் மற்றும் இருசக்கர வாகனங்களுக்கான ஒவ்வொரு நிறுத்துமிடத்திலும் மின் வாகனங்களை (EV) சார்ஜ் செய்வதற்கான மின் இணைப்புகளை வழங்க வேண்டும். இருப்பினும், 14 மீட்டர் உயரம் வரையிலான கட்டிடங்கள், எட்டு குடியிருப்புகளுக்கு மிகாத கட்டிடங்கள் மற்றும் 750 சதுர மீட்டர் வரை தளப்பரப்பு கொண்ட கட்டிடங்களுக்கு இந்த விதி பொருந்தாது.

50-க்கும் மேற்பட்ட குடியிருப்புகளைக் கொண்ட திட்டங்களில், பார்வையாளர்களுக்கான வாகன நிறுத்துமிடங்களில் பாதியளவு இடங்கள், வேகமான சார்ஜிங் (Fast charging) வசதியுடன் இருக்க வேண்டும். திருத்தப்பட்ட விதிகளில், பெரிய நிலப்பரப்புகளில் அமையும் பொதுக் கூடங்கள், திரையரங்குகள், தங்கும் விடுதிகள் மற்றும் பொழுதுபோக்கு வசதிகள் கொண்ட கட்டிடங்களுக்கு 19.5 மீட்டர் உயர வரம்பும் குறிப்பிடப்பட்டுள்ளது.

மேலும் படிக்க | தேனியில் பரபரப்பு.. காவலர்களை தாக்கிவிட்டு 17 விசாரணைக் கைதிகள் தப்பியோட்டம்!