தேனியில் பரபரப்பு.. காவலர்களை தாக்கிவிட்டு 17 விசாரணைக் கைதிகள் தப்பியோட்டம்!

தேனி மாவட்டத்தில் உள்ள சிறையில் இருந்து 15க்கும் மேற்பட்ட விசாரணை கைதிகள் தப்பி சென்றதாக வெளியாகியுள்ள தகவல் பரபரப்பை ஏற்படுத்தியுள்ளது. சிறை காவலர்களை தாக்கிவிட்டு கைதிகள் தப்பியதாக கூறப்படும் நிலையில், அவர்களை பிடிப்பதற்காக போலீசார் தீவிர நடவடிக்கைகளை மேற்கொண்டு வருகின்றனர். தப்பி சென்றவர்களில் பலர் விழுப்புரம் மாவட்டத்தை சேர்ந்தவர்கள் எனக் கூறப்படுவதால், அந்த மாவட்டத்திலும் வாகன சோதனைகள் தீவிரப்படுத்தப்பட்டுள்ளன.

சிறைக் காவலர்களை தாக்கிவிட்டு தப்பிய கைதிகள்?

தேனி மாவட்டம், ஆண்டிப்பட்டி அருகே உள்ள தேக்கம்பட்டியில் மாவட்ட சிறைச்சாலை செயல்பட்டு வருகிறது. இங்கு பல்வேறு வழக்குகளில் கைது செய்யப்பட்டு விசாரணையில் உள்ளவர்கள் அடைக்கப்பட்டுள்ளனர். சிறை காவலர்கள் தொடர்ந்து கண்காணிப்பு பணியில் ஈடுபட்டு வரும் நிலையில், நேற்று (அக்டோபர் 26, திங்கள்கிழமை) இரவு கைதிகள் சிலர் ஒன்றாக சேர்ந்து காவலர்களை தாக்கியதாக கூறப்படுகிறது.

இந்த சம்பவத்தின்போது சுமார் 17 விசாரணை கைதிகள் சிறையிலிருந்து தப்பி சென்றதாக தகவல் வெளியாகியுள்ளது. இதனால் அதிர்ச்சியடைந்த சிறை காவலர்கள், உடனடியாக உயர் அதிகாரிகளுக்கு தகவல் தெரிவித்துள்ளனர். இதைத்தொடர்ந்து, காவல்துறை அதிகாரிகள் உஷார்படுத்தப்பட்டு, சிறை அமைந்துள்ள தேக்கம்பட்டி பகுதியில் போலீசார் குவிக்கப்பட்டனர்.

மாவட்டம் முழுவதும் தேடுதல் வேட்டை!

தப்பிச் சென்றதாக கூறப்படும் கைதிகளை மீண்டும் பிடிப்பதற்காக போலீசார் பல்வேறு நடவடிக்கைகளை மேற்கொண்டுள்ளனர். சிறைச்சாலையை சுற்றியுள்ள பகுதிகளில் கண்காணிப்பு அதிகரிக்கப்பட்டதுடன், சுமார் 10 கிலோமீட்டர் சுற்றளவில் போலீசார் தேடுதல் வேட்டையில் ஈடுபட்டதாக தெரிவிக்கப்பட்டுள்ளது.

மேலும், முக்கிய சாலைகள் மற்றும் சந்தேகத்திற்குரிய வழித்தடங்களில் வாகன சோதனைகள் தீவிரப்படுத்தப்பட்டுள்ளன. தப்பிச் சென்றவர்களின் எண்ணிக்கை, அவர்கள் எந்தெந்த வழக்குகளில் தொடர்புடையவர்கள், அவர்களின் சொந்த ஊர்கள் உள்ளிட்ட விவரங்களை சேகரித்து போலீசார் விசாரணை மேற்கொண்டு வருகின்றனர்.

இதுகுறித்து காவல்துறை தரப்பில் கிடைத்த முதற்கட்ட தகவல்களின்படி, 15-க்கும் மேற்பட்ட கைதிகள் ஒரே நேரத்தில் தப்பிச் சென்றிருக்கலாம் என தெரிவிக்கப்பட்டுள்ளது. அவர்களை பிடிப்பதற்கான நடவடிக்கைகள் தொடர்ந்து நடைபெற்று வருகிறது.

விழுப்புரத்திலும் வாகன சோதனை தீவிரம்!

தப்பி சென்றவர்களில் பெரும்பாலானோர் விழுப்புரம் மாவட்டத்தை சேர்ந்தவர்கள் என்பதால், அங்குள்ள பல்வேறு பகுதிகளிலும் போலீசார் கண்காணிப்பை அதிகரித்துள்ளனர். முக்கிய சாலைகளில் செல்லும் வாகனங்கள் சோதனைக்கு உட்படுத்தப்பட்டுள்ளது.

சிறைச்சாலையில் பாதுகாப்பு பணியில் ஈடுபட்டிருந்த காவலர்களை தாக்கிவிட்டு கைதிகள் தப்பிச் சென்றதாக கூறப்படும் இந்தச் சம்பவம், சிறை பாதுகாப்பு தொடர்பான கேள்விகளையும் எழுப்பியுள்ளது.