புகார் டூ கைது வரை... அன்பில் மகேஷ் வழக்கில் இதுவரை நடந்தது என்ன? - Explained

திமுக முன்னாள் அமைச்சர் அன்பில் மகேஷ் பொய்யாமொழி கைதுதான் தமிழ்நாடு அரசியல் களத்தில் பெரும் பரபரப்பை ஏற்படுத்தி உள்ளது. தவெக ஆட்சிக்கு வந்த பின்னர், லஞ்ச புகாரில் முன்னாள் அமைச்சர் கைதாவது இதுதான் முதல்முறை எனலாம்.

தனியார் பள்ளி நிர்வாகிகளிடம் ரூ.100 கோடி அளவில் லஞ்சம் பெற்றதாக எழுந்த புகாரை தொடர்ந்து அன்பில் மகேஷ் கைதாகி உள்ளார். இந்த வழக்கின் பின்னணி, வழக்கின் விசாரணை, இதில் அன்பில் மகேஷிற்கு உள்ள தொடர்பு, இன்றைய அவரது கைது, போலீசாரின் அடுத்தக்கட்ட நடவடிக்கை ஆகியவற்றை இங்கு விரிவாக காணலாம்.

மேலும் படிக்க | விஜய் vs தனுஷ்: தேவர் குருபூஜையில் திண்டுக்கல் சீனிவாசன் ஓபன் டாக்!

கைதுக்கு தொடக்கப்புள்ளியாக இருந்த புகார்

• தமிழ்நாட்டில் தனியார் பள்ளிகளுக்கு நிரந்தர அங்கீகாரம், பள்ளிகளைத் தரம் உயர்த்துவதற்கான அனுமதி, நகர ஊரமைப்புத் துறையின் (DTCP) அனுமதி உள்ளிட்ட பல்வேறு அரசு ஒப்புதல்களைப் பெற்றுத் தருவதாகக் கூறி, பள்ளி நிர்வாகங்களிடம் பணம் வசூலிக்கப்பட்டதாக புகார் எழுந்தது.
• தமிழ்நாடு தனியார் பள்ளிகள் சங்கங்களின் கூட்டமைப்பின் நிர்வாகி டி.சி. இளங்கோவன் இந்த புகாரை அளித்தார்.
• இந்த புகாரின் அடிப்படையில் சென்னை மத்திய குற்றப்பிரிவு போலீசார் வழக்குப்பதிவு செய்து விசாரணையைத் தொடங்கினர்.
• அந்த புகாரில் தமிழ்நாடு தனியார் பள்ளிகள் சங்கத்தின் தலைவர் பி.டி. அரசகுமார் உள்ளிட்டோர், பள்ளி நிர்வாகங்களிடம் பணம் வசூலித்ததாகக் குற்றச்சாட்டு எழுந்தது. திமுகவின் செய்தித் தொடர்பு குழு துணைத் தலைவராகப் பொறுப்பு வகித்து வருகிறார். முன்னர் பாஜக மாநிலத் துணைத் தலைவராக இருந்த இவர் 2019ஆம் ஆண்டில் திமுகவில் இணைந்தது குறிப்பிடத்தக்கது.
• அரசு அனுமதிகளைப் பெற்றுத் தருவதாகக் கூறி, திமுகவின் கட்சி நிதி (Party Fund) என்ற பெயரில் பணம் வசூலிக்கப்பட்டதாகவும் புகாரில் தெரிவிக்கப்பட்டது.

பி.டி. அரசகுமார் கைது - வழக்கில் நடந்த ட்விஸ்ட்

• பி.டி. அரசகுமார் கடந்த ஜூன் 27ஆம் தேதி அன்று சென்னை மத்திய குற்றப்பிரிவு போலீசார் கைது செய்தனர். அவருடன் தொடர்புடைய சுரேஷ் ராஜா உள்ளிட்டோரையும் போலீசார் கைது செய்தனர்.
• தொடர்ந்து ஜூலை 27ஆம் தேதி அன்று அரசகுமார் மீது குண்டர் தடுப்புச் சட்டத்தின்கீழ் நடவடிக்கை எடுக்கப்பட்டது. எனினும் கைதாகி 92 நாட்கள் கடந்த நிலையிலும் கூட அரசகுமாருக்கு எதிராக குற்றப்பத்திரிகை தாக்கல் செய்யவில்லை.
• இதன் காரணமாக செப். 29ஆம் தேதி அன்று பி.டி. அரசகுமாருக்கு ஜாமீன் வழங்ப்பட்டது.  ரூ.20 ஆயிரம் மற்றும் அதே தொகைக்கு இருநபர் உத்தரவாதத்தில் அரசகுமாருக்கு நிபந்தனை ஜாமீன் வழங்கி சென்னை உயர் நீதிமன்றம் உத்தரவிட்டது.
• மேலும் காவல் நிலையத்தில் தினமும் காலை 10 மணிக்கு ஆஜராகி கையெழுதிட வேண்டும், சாட்சிகளை கலைக்கக் கூடாது, வெளிநாடு தப்பிச் செல்லக் கூடாது என்ற நிபந்தனைகளின் பேரில் அவருக்கு ஜாமீன் வழங்கப்பட்டது.

அன்பில் மகேஷ் மீது ஏன் வழக்குப்பதிவு?

கடந்த திமுக ஆட்சிக் காலத்தில் பள்ளிக்கல்வித்துறை அமைச்சராக இருந்தவர் அன்பில் மகேஷ் பொய்யாமொழி. அந்த காலகட்டத்தில் தனியார் பள்ளிகளிடம் பணம் வசூலிக்கப்பட்டதாகக் கூறப்படும் புகாரில் அவருடைய பங்கு குறித்தும் விசாரணை நடத்தப்பட்டது.

கைதானவர்கள் அளித்த வாக்குமூலங்கள், அரசு ஆவணங்கள், மின்னணு ஆதாரங்களின் அடிப்படையில் விசாரணை அன்பில் மகேஷை நோக்கி விரிவடைந்ததாகக் காவல்துறை தரப்பில் தெரிவிக்கப்பட்டது. இதையடுத்து ஊழல் தடுப்புச் சட்டத்தின் தொடர்புடைய பிரிவுகளின் கீழ் அவர் வழக்கில் குற்றஞ்சாட்டப்பட்டவராகச் சேர்க்கப்பட்டார்.

வழக்கை ரத்து செய்ய அன்பில் போட்ட தனி மனு

அன்பில் மகேஷ் தரப்பு வாதம்

• இந்த வழக்கை ரத்து செய்யக்கோரி அன்பில் மகேஷ் சென்னை உயர் நீதிமன்றத்தில் தனியாக மனுத் தாக்கல் செய்தார்.
• ஊழல் தடுப்புத் சட்டத்தின் பிரிவு 17A-இன்படி, அமைச்சராகப் பதவி வகித்தபோது நடைபெற்றதாகக் கூறப்படும் செயல்கள் தொடர்பாக விசாரணை நடத்த ஆளுநரின் முன் அனுமதி பெற வேண்டும்.
• ஆனால் ஆளுநரிடம் அனுமதி பெறாமல், அரசுத் துறைச் செயலாளரிடம் அனுமதி பெற்றே நடவடிக்கை எடுக்கப்பட்டுள்ளது, இது சட்டப்படி செல்லாது.

உயர் நீதிமன்ற நீதிபதி லட்சுமி நாராயணன், "ஆளுநரின் அதிகாரம் பற்றி திமுக எப்போது பேசத் தொடங்கியது. ஆளுநரின் அதிகாரத்தை தாடி, மீசை என ஒப்பீடு செய்தல்லவா..." என கூறியிருந்தது குறிப்பிடத்தக்கது.

காவல்துறையின் வாதம்

• இந்த வழக்கில் ஆளுநரின் முன் அனுமதி அவசியமில்லை. ஊழல் தடுப்புச் சட்டத்தின் பிரிவு 17A(b)-இன்படி உரிய அதிகாரியிடம் முன் அனுமதி பெறப்பட்ட பின்னரே, அன்பில் மகேஷுக்கு எதிராக நடவடிக்கை எடுக்கப்பட்டது. அரசுத் துறைச் செயலாளரிடம் பெறப்பட்ட அனுமதி சட்டப்படி செல்லும்.
• இந்த மனு மீது சென்னை உயர்நீதிமன்றம் இருத்தரப்பு வாதத்தையும் பதிவு செய்தது, ஆனால் இன்னும் உத்தரவு பிறப்பிக்கவில்லை. இந்த மனு மீதான விசாரணை அக்டோபர் 29ஆம் தேதிக்கு ஒத்திவைக்கப்பட்டது.

மேலும் படிக்க | Explainer: விஜய்க்கு எதிராக தனுஷ்? தவெக-வை டார்கெட் செய்யும் டெல்லி? பின்னணி என்ன?

அன்பில் வீட்டில் கைப்பற்றப்பட்ட ஆவணங்கள்

• செப்டம்பர் 16ஆம் தேதி சென்னை மற்றும் திருச்சியில் அன்பில் மகேஷ் மற்றும் அவருடன் தொடர்புடையவர்களின் வீடுகள் உள்ளிட்ட இடங்களில் குற்றப்பிரிவு போலீசார் சோதனை நடத்தினர். திருச்சி தென்னூரில் உள்ள அன்பில் மகேஷ் இல்லத்திலும் சோதனை நடைபெற்றது.
• அன்பில் மகேஷ் பொய்யாமொழி மட்டுமின்றி அவரது உதவியாளர்களான வாலாடி கார்த்திக், அருண் பிரகாஷ், பிரகாஷ் மற்றும் முத்துகுமாரின் உறவினர்களான சரவணன், ரமேஷ், கோகுல கிருஷ்ணன் ஆகியோர்களுக்கு சொந்தமான திருச்சி, சென்னை, கள்ளக்குறிச்சி ஆகிய இடங்களில் உள்ள வீடுகள் மற்றும் அலுவலங்களில் சோதனை செய்து ஆவணங்கள் மற்றும் மின்னனு சாதனங்கள் கைப்பற்றப்பட்டன.
• அதில் சொத்து ஆவணங்கள், வங்கிப் பரிவர்த்தனை தொடர்பான ஆவணங்கள், காசோலைகள், மின்னணு சாதனங்கள் உள்ளிட்டவை கைப்பற்றப்பட்டதாக செய்திகள் வெளியாகின.
• இதற்கிடையே பணம் சட்டவிரோதமாகப் பரிமாற்றம் செய்யப்பட்டதா என்பதைக் கண்டறிய அமலாக்கத்துறையும் களமிறங்கி, அக்டோபர் 1ஆம் தேதி பணமோசடி தடுப்புச் சட்டத்தின் கீழ் விசாரணையைத் தொடங்கியது.
• அன்பில் மகேஷ் வீட்டில் கைப்பற்ற ஆவணங்களை அடிப்படையாக வைத்து விசாரணைக்கு ஆஜராக சம்மன் அனுப்பினர். அக்டோபர் 21ஆம் தேதி மத்திய  குற்றப்பிரிவு போலீசார் அவரிடம் 8 மணிநேரம் விசாரணை மேற்கொண்டனர். அதில் 240 கேள்விகளை அன்பில் மகேஷிடம் கேட்டுள்ளனர்.
• அதில் பி.டி. அரசகுமாரின் தொடர்பு, பள்ளிகளின் பட்டியல்கள், பண விநியோகம் தொடர்பாக பல்வேறு கேள்விகள் எழுப்பப்பட்டன.

முன்ஜாமீன் மனு: நடந்தது என்ன?

கைது நடவடிக்கையைத் தவிர்க்க அன்பில் மகேஷ் தரப்பு சென்னை உயர் நீதிமன்றத்தில் மனுத்தாக்கல் செய்தது.

காவல்துறை தரப்பு வாதம்

• அரசு வழக்கறிஞர் வாதிடும்போது, "இது 100 கோடி ரூபாய்க்கு அதிகமான பெரும் முறைகேடு. இடைத்தரகர், கார் ஓட்டுநர் சுரேஷ் வழியாகப் பணம் கைமாறியதற்கான புகைப்பட மற்றும் டிஜிட்டல் ஆதாரங்கள் உள்ளன.
• வழக்கில் தலைமறைவாக இருக்கும் முக்கிய குற்றவாளியாக கருதப்படும் முத்துக்குமாரின் இருப்பிடத்தைக் கண்டறியவும், விசாரணையை முன்னெடுக்கவும் அன்பில் மகேஷை காவலில் எடுத்து விசாரிப்பது அவசியம்.
• அன்பில் மகேஷிற்கு முன்ஜாமீன் வழங்கினால் சாட்சிகளை கலைக்க நேரிடும். எனவே அவரை காவலில் எடுத்து விசாரிக்கே வேண்டும்.

அன்பில் மகேஷ் தரப்பு வாதம்

• அரசியல் உள்நோக்கத்தோடு பழிவாக்கும் நோக்கில் இந்த வழக்கு போடப்பட்டுள்ளது. ஏற்கெனவே 8 மணிநேரம் விசாரணைக்கு முழு ஒத்துழைப்பு வழங்கப்பட்டுள்ளது. ஆவணங்கள் அனைத்தும் அரசிடம் உள்ளதால் முன்ஜாமீன் வழங்க வேண்டும் என வாதிடப்பட்டது.
• இருத்தரப்பு வாதங்களையும் கேட்ட நீதிபதி லட்சுமி நாராயணன், விசாரணை இன்னும் ஆரம்பக் கட்டத்திலேயே இருப்பதால் தற்போதைய சூழலில் முனஜாமீன் வழங்க முடியாது என்ற காவல்துறையின் வாதத்தை ஏற்று முன்ஜாமீன் மனுவை ரத்து செய்தது.

அரசியல் பழிவாங்கும் நோக்கோடு முன்னாள் அமைச்சர் சகோதரர் @Anbil_Mahesh அவர்களை கைது செய்துள்ள இந்த Circus ஆட்சியாளர்களை வன்மையாக கண்டிக்கிறேன். திரும்பிய திசையெல்லாம் தறிகெட்டு போயிருக்கும் சட்டம் ஒழுங்கு பிரச்சினைகள் - விலைவாசி உயர்வு - த.வெ.க.வினரின் அட்டூழியங்கள் என இந்த கோமாளி அரசின் தோல்விகளை மறைக்கவும் - திசைத்திருப்பவுமே இந்த கைது நடவடிக்கையை மேற்கொண்டிருக்கிறார் டம்மி CM. சகோதரர் அன்பில் மகேஸ் இந்தச்சூழலை சட்டப்படி எதிர்கொண்டு மீண்டு வருவார். வழக்கினாலும் - கைது நடவடிக்கைகளாலும் கழக உடன்பிறப்புகளை ஒரு போதும் அடக்க முடியாது.

— Udhay (@Udhaystalin) October 26, 2026

அன்பில் மகேஷ் கைது

• முன்ஜாமீன் மனு ரத்தானதை தொடர்ந்து போலீசார் அன்பில் மகேஷ் கைது செய்ய சென்னையில் உள்ள அவரது வீடுகளுக்குச் சென்றுள்ளனர். அப்போது அங்கு எங்குமே அவர் இல்லை.
• அடுத்தக்கட்ட நடவடிக்கை குறித்து ஆலோசனை மேற்கொள்ள சென்னை அமைந்தகரை வழக்கறிஞர் அலுவலகத்திற்கு வந்த அன்பில் மகேஷ், ஆலோசனை முடித்து வரும்போது வாசலிலேயே மத்திய குற்றப்பிரிவு போலீசார் அவரை கைது செய்தனர். தொடர்ந்து, வேப்பேரி காவல் ஆணையர் அலுவலகத்திற்கு அவர் விசாரணைக்கு அழைத்துச் செல்லப்பட்டார்.
• சென்னை ராஜீவ் காந்தி அரசு மருத்துவமனையில் அன்பில் மகேஷிற்கு மருத்துவ பரிசோதனை நிறைவு பெற்றது. அவர் மீண்டும் காவல் ஆணையர் அலுவலகம் கொண்டுவரப்பட்டார். இன்றிரவே நீதிபதி முன்பு ஆஜர்படுத்தப்பட வாய்ப்புள்ளது.

#WATCH | Chennai, Tamil Nadu: Former Tamil Nadu School Education Minister and DMK leader Anbil Mahesh Poyyamozhi was brought to the Madras High Court to be presented before the Magistrate. He was arrested in connection with an alleged ₹100-crore private school approval scam. The case involves allegations that money was collected from private school managements by promising government approvals, permanent recognition, and permission to upgrade schools.

— ANI (@ANI) October 26, 2026

கைதான பின் அன்பில் மகேஷ் கூறியது...

கைதான பின்னர் மருத்துவமனையில் சோதனைக்கு பின் செய்தியாளர்களிடம் பேசிய அன்பில் மகேஷ், "விசாரணைக்கு முழு ஒத்துழைப்பு அளித்தோம், ஏற்கெனவே 8 மணிநேர விசாரணைக்கு ஒத்துழைப்பு கொடுத்தோம்.

முன்ஜாமீனை மறுப்பதற்கு அரசு தரப்பில் எப்போது சில வாதங்கள் முன்வைக்கப்படும். ஆனால், அந்த வாதங்கள் அனைத்தும் கட்டுக்கதையாகவே உள்ளன. இதை அவர்களால் நிரூபிக்க முடியாது. முன்ஜாமீன் கொடுத்ததும் கைது செய்ய வேண்டும் என்பதற்காக கைது செய்துள்ளனர்" என்றார்.

மேலும் படிக்க | ஆவின் பால் உற்பத்தி நிறுத்தமா? அதிர்ச்சியில் மக்கள்... ஆவின் நிர்வாகம் விளக்கம்