சென்னை மக்களே உஷார்... நவம்பர் 21, 22 போக்குவரத்து மாற்றங்கள் - முழு விவரம் இதோ
குடியரசுத் துணைத் தலைவர் சி.பி. ராதாகிருஷ்ணன் சென்னை வருகையை ஒட்டி நகரில் செய்யப்பட்டுள்ள போக்குவரத்து மாற்றங்கள் குறித்து சென்னை பெருநகர போக்குவரத்து காவல்துறை தெரிவித்துள்ளது.
Chennai Traffic Diversion: குடியரசுத் துணைத் தலைவர் சி.பி. ராதாகிருஷ்ணன் நாளையும் (நவ. 21), நாளை மறுதினமும் (நவ. 22) சென்னைக்கு வருகை தருவதையொட்டி சில போக்குவரத்து ஏற்பாடுகள் செய்யப்பட்டுள்ளன.
குடியரசுத் துணைத் தலைவர் சி.பி. ராதாகிருஷ்ணன் சென்னைக்கு வருகை தருவதை ஒட்டி, குறிப்பிட்ட வழித்தடங்களில் 'பூஜ்ஜிய போக்குவரத்து' (Zero Traffic) நடைமுறை அமல்படுத்தப்படுவதாக சென்னை பெருநகர போக்குவரத்து காவல்துறை தெரிவித்துள்ளது.
கனரக மற்றும் வணிக வாகனங்கள் கவனத்திற்கு...
அதன்படி, போக்குவரத்து நெரிசலைத் தவிர்க்கவும், பொதுமக்களின் பாதுகாப்பை உறுதி செய்யவும் சென்னையின் முக்கிய இடங்களில் கனரக மற்றும் வணிக வாகனங்களுக்குப் போக்குவரத்து மாற்றங்கள் மற்றும் கட்டுப்பாடுகள் ஏற்படுத்தபட்டுள்ளதாக சென்னை போக்குவரத்து காவல்துறை தெரிவித்துள்ளது.
நவ. 21 போக்குவரத்து மாற்றங்கள்
நாளை பிற்பகல் 2 மணிமுதல் இரவு 9 மணிவரை செய்யப்பட்டுள்ள மாற்றங்கள்
- தாம்பரத்தில் இருந்து வரும் வாகனங்கள் திருநீர்மலை சந்திப்பில் திருப்பி விடப்பட்டு குன்றத்தூர் சாலை வழியாக செல்லலாம்.
- பல்லாவரத்திலிருந்து வரும் வாகனங்கள் பன்னாட்டு விமான நிலைய சந்திப்பில் (ஹோட்டல் ஏர்வே) திருப்பிவிடப்பட்டு தாம்பரம் நோக்கிச் செல்லலாம்.
- போரூரில் இருந்து வரும் வாகனங்கள் கத்திப்பாராவில் திருப்பி விடப்பட்டு வடபழனி வழியாகச் செல்லலாம்.
- அசோக் பில்லரில் இருந்து வரும் வாகனங்கள் சிபெட் (CIPET) சந்திப்பில் திருப்பிவிடப்பட்டு கிண்டி தொழிற்பேட்டை நோக்கிச் செல்லலாம்.
- அண்ணா சாலையில் இருந்து வரும் வாகனங்கள் எம்.சி.ராஜா யு-டர்னில் (MC Raja U-turn) திருப்பி விடப்படும்.
- அடையாறில் இருந்து வரும் வாகனங்கள் எல்.பி.சாலையில் (LB Road) திருப்பி விடப்படும்.
- பழைய மகாபலிபுரம் சாலை பகுதியில் இருந்து வரும் வாகனங்கள் எஸ்.ஆர்.பி. டூல்ஸ் (SRP Tools) பகுதியில் திருப்பிவிடப்படும்.
- இசிஆர் பகுதியில் இருந்து வரும் வாகனங்கள் அக்கரை சந்திப்பில் திருப்பி விடப்படும்.
நவ. 22 போக்குவரத்து மாற்றங்கள்
நாளை மறுதினம் (நவ. 22) காலை 8 மணிமுதல் இரவு 10:30 மணி வரை வரை செய்யப்பட்டுள்ள மாற்றங்கள்
- அடையாறில் இருந்து பாரிஸ் கார்னர் நோக்கி வரும் வாகனங்கள் கிரீன்வேஸ் சந்திப்பில் திருப்பி விடப்பட்டு, கிரீன்வேஸ் சாலை, ஆர்.ஏ.புரம் 2வது பிரதான சாலை சந்திப்பு, சேமியர்ஸ் சாலை, டி.டி.கே சாலை, மியூசிக் அகாடமி சந்திப்பு, ஆர்.கே. சாலை மற்றும் அண்ணா சாலை வழியாகச் சென்று தங்களது இலக்கை அடையலாம்.
- பாரிஸ் கார்னரில் இருந்து அடையாறு நோக்கி வரும் வாகனங்கள் உழைப்பாளர் சிலை (Labour Statue) பகுதியில் திருப்பி விடப்பட்டு, வாலாஜா சாலை மற்றும் அண்ணா சாலை வழியாகச் சென்று தங்களது இலக்கை அடையலாம்.
போக்குவரத்து நெரிசல் மற்றும் அசௌகரியங்களைத் தவிர்க்க பொதுமக்கள் போக்குவரத்து காவல்துறையினருக்கு ஒத்துழைப்பு வழங்குமாறும், தற்காலிகப் போக்குவரத்து விதிமுறைகளைக் கருத்தில் கொண்டு முன்கூட்டியே தங்கள் பயணங்களைத் திட்டமிடுமாறும் கேட்டுக்கொள்ளுமாறும் சென்னை போக்குவரத்து காவல்துறை தெரிவித்துள்ளது.
மேலும் படிக்க | சோஷியல் மீடியா பிரபலத்தைக் காண டெல்லி சென்ற சென்னை நபர் அடித்துக் கொலை