கரையை கடக்கும் அர்னாப் புயல்!! தத்தளிக்கும் ஆந்திரா, தயாராகும் ஒடிசா

Cyclone Arnab: வங்காள விரிகுடாவில் உருவான 'அர்னாப்' புயல், ஆந்திராவின் காக்கிநாடா கடற்கரை அருகே கரையைக் கடந்து வருகிறது. அக்டோபர் 23-ல் தொடங்கிய காற்றழுத்தத் தாழ்வு பகுதி படிப்படியாக வலுப்பெற்று அதிதீவிர புயலாக மாறியது. புயலின் வேகம் குறைந்துள்ளதால் கரையைக் கடக்க சில மணி நேரம் ஆகும் என வானிலை மையம் தெரிவித்துள்ளது. ஆந்திர மாநில அரசு மக்களுக்கும் அதிகாரிகளுக்கும் உயர் எச்சரிக்கை விடுத்துள்ளது.

கோனசீமா மாவட்டத்தில் கனமழை

ஆந்திரப் பிரதேசத்தின் கோனசீமா மாவட்டத்தில், 'அர்னாப்' புயலால் பலத்த காற்று மற்றும் கனமழை ஏற்பட்டுள்ளது. இதனால் பல இடங்களில் மரங்கள் வேரோடு சாய்ந்துள்ளன, மேலும் அப்பகுதி முழுவதும் இயல்பு வாழ்க்கை பாதிக்கப்பட்டுள்ளது.

கடுமையான வானிலை நிலவுவது குறித்த தகவல்கள் வெளியானதைத் தொடர்ந்து, ஆந்திரப் பிரதேச மாநில பேரிடர் மேலாண்மை ஆணையம் (APSDMA) கடந்த 24 மணிநேரமாகப் புயலின் நகர்வையும், கடலோர மாவட்டங்களில் அதன் தாக்கத்தையும் தொடர்ந்து கண்காணித்து வருகிறது.

அதிகாலை கரையைக் கடக்கத் தொடங்கிய அர்னாப் புயல்

இந்திய வானிலை ஆய்வு மையம் (IMD) வெளியிட்டுள்ள தகவலின்படி, புதன்கிழமை அதிகாலையில் 'அர்னாப்' புயல் ஆந்திரப் பிரதேசம் மற்றும் யானம் கடற்கரைப் பகுதிகளில் கரையை கடக்கத் தொடங்கியது. இதனால் அப்பகுதிகளில் கனமழை கொட்டித் தீர்த்தது. புயலின் போது காற்றின் வேகம் மணிக்கு 125 முதல் 135 கி.மீ வரை இருந்தது. அவ்வப்போது காற்றின் வேகம் 150 கி.மீ வரை அதிகரித்தது. புயல் மணிக்கு 3 கி.மீ வேகத்தில் வடமேற்கு திசையை நோக்கி நகர்ந்தது.

யானத்திற்குத் தெற்கே, பாபட்லா மற்றும் விசாகப்பட்டினத்திற்கு இடைப்பட்ட பகுதியில் புயல் கரையை கடப்பதாக இந்திய வானிலை ஆய்வு மையம் தெரிவித்துள்ளது. கரையை கடக்கும் இந்த செயல்முறை சுமார் மூன்று மணிநேரம் நீடிக்கும் என்று கணிக்கப்பட்டுள்ளது. மேலும், காக்கிநாடா மற்றும் யானம் அருகிலுள்ள தாழ்வான பகுதிகளில், கடல் நீர் மட்டம் இயல்பை விட 1.5 முதல் 2.5 மீட்டர் வரை உயரக்கூடும் என்றும், இதனால் அப்பகுதிகளில் வெள்ளம் ஏற்பட வாய்ப்புள்ளதாகவும் எச்சரிக்கை விடுக்கப்பட்டுள்ளது.

மாநிலத்தின் பிற பகுதிகளில், காக்கிநாடாவில் மரங்கள் வேரோடு சாய்ந்தன. மின் இணைப்புகள் துண்டிக்கப்பட்டன. விசாகப்பட்டினத்தில் பலத்த மழை மற்றும் சூறாவளிக் காற்றால் பீச் ரோடு (Beach Road) மற்றும் சீத்தம்மா தாரா (Seethammadhara) போன்ற சாலைகளில் போக்குவரத்து பாதிக்கப்பட்டது.

மேலும் படிக்க | மிக தீவிரப் புயலாக மாறிய அர்னாப்... கரையை கடப்பது எப்போது? சென்னையில் கடல் கொந்தளிப்பு

அக்டோபர் 27 காலை 8:30 மணி முதல் அக்டோபர் 28 அதிகாலை 3 மணி வரை, அனகாபள்ளி மற்றும் விசாகப்பட்டினம் மாவட்டங்களில் பல இடங்களில் 200 மில்லிமீட்டருக்கும் அதிகமான கனமழை பதிவாகியுள்ளதாக இந்திய வானிலை ஆய்வு மையம் தெரிவித்துள்ளது. இது தவிர, மேற்கு வங்காளத்தின் சில பகுதிகளிலும் பலத்த காற்றுடன் கூடிய கனமழை பெய்துள்ளது.

பள்ளிகளுக்கு விடுமுறை

புயல் கரையைக் கடக்கும் செயல்முறை புதன்கிழமை காலையில் தொடங்கி பிற்பகலுக்குள் முடிவடையும் என எதிர்பார்க்கப்படுகிறது. இந்த செயல்முறை பொதுவாக பல மணிநேரம் நீடிக்கும். முதலில் புயலின் வெளி விளிம்பு முதலில் நிலத்தை அடையும், அதைத் தொடர்ந்து புயலின் மையப்பகுதியும் பின்பகுதியும் நிலத்தை அடையும். வடக்கு ஆந்திரப் பிரதேசம் மற்றும் தெற்கு ஒடிசா பகுதிகளில் இதன் தாக்கம் கடுமையாக இருக்கும் என எதிர்பார்க்கப்படுகிறது.

விசாகப்பட்டினம் மற்றும் அதன் சுற்றுவட்டாரப் பகுதிகளில் செவ்வாய்க்கிழமையன்றே கனமழை பெய்து வந்ததால், பள்ளிகள் மூடப்பட்டன, கடலோரக் குடியிருப்புகள் காலி செய்யப்பட்டன. இன்றும் பள்ளிகளுக்கு விடுமுறை அளிக்கப்பட்டுள்ளது. மேலும் தேசிய பேரிடர் மீட்புப் படை தயார் நிலையில் வைக்கப்பட்டுள்ளது. பூரி கடற்பகுதியில் கடல் கொந்தளிப்பாக இருந்தது, அங்கு கனமழை பதிவானது. புயலின் வெளிப்புற மேகப் பட்டைகள், விசாகப்பட்டினத்திலிருந்து 700 கி.மீ.க்கும் அதிகமான தொலைவில் உள்ள கொல்கத்தாவிற்கும் மழையைக் கொண்டு வந்தன. பிற்பகலில் வானம் மேகமூட்டமாக மாறியதைத் தொடர்ந்து, மத்திய கொல்கத்தாவில் இரவு 8.30 மணியளவில் மழை பெய்யத் தொடங்கியது.

மேலும் படிக்க | Tamil News LIVE : அர்னாப் புயல் லைவ், ஆட்டோ கட்டணம் உயர்வு, தமிழ்நாடு அரசின் அறிவிப்புகள் - இன்றைய முக்கிய செய்திகள்

ஒடிசாவில் முன்னெச்சரிக்கை நடவடிக்கைகள்

ஒடிசாவில், 'அர்னாப்' புயல் ஆந்திரப் பிரதேச கடற்கரை அருகே கரையை கடக்கும் சூழலில், மாநில அவசரக்கால செயல்பாட்டு மையத்தில் வருவாய் மற்றும் பேரிடர் மேலாண்மைத்துறை அமைச்சர் சுரேஷ் பூஜாரி, உயர் அதிகாரிகளுடன் ஆய்வுக்கூட்டம் நடத்தி, மேற்கொள்ளப்பட்டுள்ள முன்னெச்சரிக்கை நடவடிக்கைகளை மதிப்பாய்வு செய்தார்.

கூட்டத்திற்குப் பிறகு, அமைச்சர் பூஜாரி கூறியதாவது:

“காக்கிநாடாவில் இன்று அதிகாலை சுமார் 1:30 மணியளவில் புயல் கரையை கடக்கும் செயல்முறை தொடங்கியது; அது ஆந்திரப் பிரதேச மாநிலத்தை நோக்கி நகரத் தொடங்கியது. தற்போதைய தகவல்களின்படி, அந்த வானிலை அமைப்பு தற்போது ஒரே இடத்தில் நிலை கொண்டுள்ளது. ஆந்திரப் பிரதேச கடற்கரையை அடைந்த பிறகு, அது வடக்கு மற்றும் வடமேற்கு திசையை நோக்கி நகர்ந்து மல்கங்கிரியைச் சென்றடையும்.”

புயல் நகர்ந்து கொண்டிருக்கும் சூழலில், “உயிரிழப்பு ஏதுமற்ற” நிலையை உறுதி செய்வதே மாநில அரசின் முதன்மையான இலக்கு என்று அவர் வலியுறுத்தினார்.

மேலும் படிக்க | ஹைதராபாத்தில் வற்றிப்போன தண்ணீர்! எமர்ஜென்சி நிலை அறிவிப்பு..8 மாசத்திற்கு கஷ்டம்..