Explainer: ஓய்வூதியதாரர்கள் வீட்டில் இருந்தபடியே ஆயுள் சான்றிதழை சமர்ப்பிப்பது எப்படி?

Life Certificate: அக்டோபர், நவம்பர் மாதங்கள் ஓய்வூதியம் பெறும் மூத்த குடிமக்களுக்கு மிகவும் முக்கியமான மாதங்களாகும். ஏனெனில், இந்த மாதங்களில் அவர்கள் தங்கள் ஆயுள் சான்றிதழ்களை சமர்ப்பிக்கும் செயல்முறையை மேற்கொள்கிறார்கள். ஓய்வூதியம் பெறுபவர்கள் இதனை உரிய நேரத்தில் சமர்ப்பிக்க வேண்டியது அவசியம்.

ஓய்வூதியதாரர்களுக்கான ஆயுள் சான்றிதழ்

வயது வரம்பின் அடிப்படையில் டிஜிட்டல் வாழ்நாள் சான்றிதழ்களைச் சமர்ப்பிக்க அரசு ஒரு முறையை அறிமுகப்படுத்தியுள்ளது. இதில் வெவ்வேறு வயதுப் பிரிவினருக்குத் தனித்தனி காலக்கெடுக்கள் ஒதுக்கப்பட்டுள்ளன.

• 80 வயது அல்லது அதற்கு மேற்பட்ட வயதுடைய ஓய்வூதியம் பெறுபவர்கள் அக்டோபர் 1-ஆம் தேதி முதல் தங்கள் டிஜிட்டல் வாழ்நாள் சான்றிதழ்களைச் சமர்ப்பிக்கலாம். 
• 80 வயதுக்குட்பட்டவர்களுக்கு சமர்ப்பிப்பு காலம் நவம்பர் மாதம் தொடங்குகிறது. 
• தகுதியுள்ள அனைத்து ஓய்வூதியம் பெறுபவர்களுக்கும் தங்கள் வாழ்நாள் சான்றிதழ்களைச் சமர்ப்பிக்க நவம்பர் 30-ஆம் தேதி வரை அவகாசம் அளிக்கப்பட்டுள்ளது. 
• இந்த காலக்கெடுவில் அரசு எந்த மாற்றமும் செய்யவில்லை.

மேலும் படிக்க | UPI MDR கட்டணம்: அமலாக்கம் ஒத்திவைப்பா? பண்டிகை காலத்தில் NCPI நிவாரணம்

ஜீவன் பிரமாண்: அக்டோபர் 1 முதல் யார் சமர்ப்பிக்கலாம்?

அக்டோபர் 1-ல் தொடங்கும் இந்தச் செயல்முறை அனைத்து ஓய்வூதியதாரர்களுக்கும் பொருந்தாது. இது குறிப்பாக 80 வயது மற்றும் அதற்கு மேற்பட்ட வயதுடைய முதியவர்களுக்காகவே உருவாக்கப்பட்டுள்ளது. நவம்பர் மாதத்தில் ஏற்படும் கூட்ட நெரிசல் மற்றும் நீண்ட வரிசைகளில் முதிய ஓய்வூதியதாரர்கள் காத்திருப்பதைத் தவிர்க்கும் நோக்கில், அரசு இந்த முன்கூட்டிய கால அவகாசத்தை ஏற்படுத்தியுள்ளது.

80 வயது மற்றும் அதற்கு மேற்பட்ட ஓய்வூதியதாரர்கள்: அக்டோபர் 1 முதல் நவம்பர் 30 வரையிலான காலத்திற்குள் எப்போது வேண்டுமானாலும் தங்கள் டிஜிட்டல் சான்றிதழைச் (Digital Life Certificate) சமர்ப்பிக்கலாம் (இவர்களுக்கு முழுமையாக இரண்டு மாத கால அவகாசம் வழங்கப்படுகிறது).

80 வயதுக்குட்பட்ட ஓய்வூதியதாரர்கள்: நவம்பர் 1 முதல் நவம்பர் 30 வரை நடைபெறும் வழக்கமான சமர்ப்பிப்புக் காலத்திற்காகக் காத்திருக்க வேண்டும்.

அனைத்து அரசு ஓய்வூதியதாரர்களுக்கும், வாழ்நாள் சான்றிதழைச் சமர்ப்பிப்பதற்கான இறுதித் தேதி நவம்பர் 30, 2026 ஆகும். இந்த காலக்கெடுவுக்குள் ஆவணத்தைச் சமர்ப்பிக்கத் தவறினால், சான்றிதழ் சரிபார்க்கப்படும் வரை ஓய்வூதியத் தொகையை வழங்குவது தற்காலிகமாக நிறுத்தி வைக்கப்படலாம்.

மேலும் படிக்க | 8வது ஊதியக் குழு: சம்பள உயர்வு, பதவி உயர்வு.... அஞ்சல் துறை ஊழியர்களின் முக்கிய கோரிக்கைகள் என்னென்ன?

டிஜிட்டல் ஆயுள் சன்றிதழை எப்படி சமர்ப்பிப்பது?

டிஜிட்டல் வாழ்நாள் சான்றிதழை  (DLC) சமர்ப்பிக்க ஓய்வூதியதாரர்கள் வங்கிக்கோ, தாங்கள் பணிபுரிந்த அலுவலகத்திற்கோ சென்று அலைய வெண்டிய அவசியம் இல்லை. ஓய்வூதியதாரர்கள் இப்போது பல்வேறு வசதியான வழிகள் மூலம் தங்கள் சரிபார்ப்பு நடைமுறையை நிறைவு செய்ய முடிவதால், வங்கிகளில் நீண்ட வரிசையில் காத்திருக்கும் நிலை முடிவுக்கு வந்துள்ளது.

முக அங்கீகாரம் (face authentication), பயோமெட்ரிக் அங்கீகாரம் மற்றும் வீட்டு வாசலிலேயே வங்கிச் சேவை (doorstep banking) போன்ற வசதிகளைப் பயன்படுத்தி, ஓய்வூதியம் பெறுபவர்கள் தங்கள் வீட்டிலிருந்தபடியே வாழ்நாள் சான்றிதழ்களைச் சமர்ப்பிக்கலாம்.

1. தொலைபேசி மூலம் முக அங்கீகாரம் (Face Authentication): மிக மூத்த குடிமக்கள் (Super Senior Citizens) தங்கள் வீட்டில் இருந்தபடியே ஸ்மார்ட்போனைப் பயன்படுத்தி இச்சான்றிதழைப் பெறலாம். அதற்கான செயல்முறை இதோ:

• முதலில் Android அல்லது iOS சாதனத்தில் 'Jeevan Pramaan' செயலி மற்றும் 'Aadhaar Face RD' செயலியைப் பதிவிறக்கவும்.
• ஆதார் எண், மொபைல் எண், PPO எண் மற்றும் வங்கிக் கணக்கு விவரங்களை உள்ளிடவும்.
• ஸ்மார்ட்போனின் முன்பக்க கேமராவைப் பயன்படுத்தி முக ஸ்கேன் (face scan) மூலம் சரிபார்ப்பை நிறைவு செய்யவும்.
• சரிபார்ப்பு முடிந்ததும், உடனடி உறுதிப்படுத்தல் தகவல் மற்றும் 'Pramaan ID' ஆகியவை SMS மூலம் அனுப்பப்படும்.

2. வீட்டு வாசலில் வங்கிச் சேவைகள் (Doorstep banking services): தொழில்நுட்பத்தைப் பயன்படுத்துவதில் சிரமம் உள்ளவர்கள் அல்லது பிறரின் 
உதவியை விரும்புபவர்களுக்காக, பொதுத்துறை வங்கிகள் மற்றும் இந்தியா போஸ்ட் பேமெண்ட்ஸ் வங்கி (IPPB) ஆகியவை வீட்டு வாசலிலேயே சேவைகளை வழங்குகின்றன. வங்கியின் பிரதிநிதி ஒருவர் ஓய்வூதியதாரரின் வீட்டிற்கு நேரில் வந்து, பயோமெட்ரிக் அங்கீகாரத்தைப் (கைரேகை அல்லது கண் கருவிழி ஸ்கேன்) பெற்று, அங்கேயே சான்றிதழைச் சமர்ப்பிப்பார்.

3. வங்கிக் கிளைகள் மற்றும் குடிமக்கள் சேவை மையங்கள் (CSCs): ஓய்வூதியதாரர்கள் தங்கள் உள்ளூர் வங்கிக் கிளை, அஞ்சல் நிலையம் அல்லது அருகிலுள்ள பொதுச் சேவை மையத்திற்கு (CSC) நேரில் சென்று பயோமெட்ரிக் ஸ்கேனிங் நடைமுறையை மேற்கொள்ளலாம்.

ஜீவன் பிரமாண் என்றால் என்ன?

ஜீவன் பிரமாண் பற்றி ஊழியர்களின் வருங்கால வைப்பு நிதி அமைப்பு (EPFO) விளக்கியுள்ளது. EPFO தெரிவித்ததாவது:

"ஜீவன் பிரமாண் என்பது ஓய்வூதியதாரர்கள் தங்கள் ஆயுள் சான்றிதழ்களைச் சமர்ப்பிக்கும் செயல்முறையை எளிதாக்குவதற்காக இந்திய அரசால் தொடங்கப்பட்ட ஒரு பயோமெட்ரிக் வசதி கொண்ட டிஜிட்டல் சேவையாகும்."

"இது ஓய்வூதியம் வழங்கும் முகமைகளுக்கு நேரில் செல்ல வேண்டிய தேவையை நீக்குகிறது. இதன் மூலம் மத்திய, மாநில, பாதுகாப்புத் துறை, பொதுத்துறை நிறுவனங்கள் மற்றும் பிற அரசு நிறுவனங்களில் உள்ள ஓய்வுபெற்ற ஊழியர்களுக்கு வசதியையும் கண்ணியத்தையும் உறுதி செய்கிறது. ஆதார் அடிப்படையிலான அங்கீகாரத்தின் மூலம், ஓய்வூதியதாரர்கள் தங்கள் டிஜிட்டல் ஆயுள் சான்றிதழை வங்கிகள் மற்றும் முகமைகளுடன் ஆன்லைனில் தடையின்றி உருவாக்கிப் பகிரலாம்," என்றும் EPFO மேலும் கூறியுள்ளது.

மேலும் படிக்க | Explainer: ரெப்போ விகிதத்தை அதிகரித்த RBI... கடன் EMI-ஐ குறைக்க உதவும் 4 எளிய வழிகள்