சென்னையில் மெட்ரோ ரயில் பயணத்துடன், வணிகத்தையும் ஒருங்கிணைக்கும் புதிய முயற்சி! மெட்ரோ ரயில் நிலையத்திற்குச் செல்ல வேண்டும் என்றால் தனியாகப் பயணிக்க வேண்டிய அவசியமில்லை... ஒரே வளாகத்தில் அலுவலகம், கடைகள், உணவகங்கள் என அனைத்தையும் அணுகும் வகையில், புதிய வசதி உருவாகிறது. சென்னை மெட்ரோ ரயில் நிறுவனமான CMRL, திருமங்கலம் மெட்ரோ ரயில் நிலையத்தை ஒட்டி, 4 வணிகக் கட்டடங்களைக் கட்டுவதற்கு, 446 கோடியே 88 லட்சம் ரூபாய் மதிப்பிலான ஒப்பந்தத்தை வழங்கியுள்ளது. கட்டுமானப் பணிகளுக்கான ஒப்பந்தத்தை, Capacite Infraprojects நிறுவனம் பெற்றுள்ளது. கட்டடக் கட்டுமானம், உள் அலங்காரப் பணிகள், குடிநீர் மற்றும் மின்சார வசதிகள் உள்ளிட்ட, அனைத்துப் பணிகளும் இந்த ஒப்பந்தத்தில் இடம்பெற்றுள்ளன. மொத்தம் 3.85 ஏக்கர் பரப்பளவில், இந்த 4 கட்டடங்களும் அமைக்கப்படுகின்றன.