தீபாவளி கொண்டாட்டம் முடிந்து, தொடர் விடுமுறையும் நிறைவடைந்த நிலையில், சொந்த ஊர்களுக்குச் சென்ற மக்கள் மீண்டும் சென்னையை நோக்கிப் படையெடுக்கத் தொடங்கியுள்ளனர். திருச்சி, மதுரை, சேலம், கோவை, தேனி உள்ளிட்ட தென் மாவட்டங்களில் இருந்து வந்த ஆயிரக்கணக்கான பயணிகள் கிளாம்பாக்கம் பேருந்து நிலையத்தில் குவிந்ததால், அப்பகுதியே மக்கள் கூட்டத்தால் திக்குமுக்காடியது. இதனால் சாலைகளிலும் போக்குவரத்து நெரிசல் ஏற்பட்டது. இதையடுத்து நூற்றுக்கணக்கான போலீஸார் குவிக்கப்பட்டு, கூட்டத்தையும் போக்குவரத்தையும் சீரமைக்கும் பணியில் ஈடுபட்டனர்.